Read luganda Zabbuli 18 Bible Online

Zabbuli 18 - luganda bible

Zabbuli 18

¹Ya mukulu w'abayimbi. Zabbuli ya Dawudi omuddu wa Mukama, eyagamba Mukama ebigambo eby'oluyimba luno ku lunaku Mukama lwe yamuwonyezaako mu mukono gw'abalabe be bonna, ne mu mukono gwa Sawulo: n'ayogera nti. Nkwagala ggwe, ai Mukama, amaanyi gange.

² Mukama lwe lwazi lwange, era kye kigo kyange, era ye andokola; Katonda wange, olwazi lwange olunywevu, oyo gwe ŋŋenda okwesiganga; Engabo yange, n'ejjembe ery'obulokozi bwange, ekigo kyange ekigulumivu.

³ Naakoowoolanga Mukama, asaanira okutenderezebwa: Bwe nnaalokokanga bwe ntyo mu balabe bange.

⁴ Emigwa egy'okufa gyansiba, N'ebitaba eby'obutatya Katonda byantiisa.

⁵Emigwa egy'emagombe gyanneetooloola: Emitego egy'olumbe gyankwasa.

⁶ Mu nnaku zange ne nkoowoola Mukama, Ne mpita Katonda wange: N'awulira eddoboozi lyange mu yeekaalu ye, Ne bye nnakaabira mu maaso ge ne bituuka mu matu ge.

⁷ Ensi n'eryoka ekankana n'esagaasagana, Era n'emisingi gy'ensozi ne gikankana ne ginyeenyezebwa, Kubanga asunguwadde.

⁸ Omukka ne gunyooka mu nnyindo ze, N'omuliro ne guva mu kamwa ke ne gulya: Ne gukoleeza amanda.

⁹ Era n'eggulu n'alikutamya, n'akka; N'ekizikiza ekinene ne kiba wansi w'ebigere bye.

¹⁰ Ne yeebagala kerubi n'abuuka: Era n'abuuka mangu ku bimaawaatiro eby'empewo.

¹¹ Ekizikiza n'akifuula eky'okwekwekamu, eweema ye emwetoolodde; Ekizikiza eky'amazzi, ebire ebikutte eby'omu ggulu.

¹²Mu kumasamasa okuli mu maaso ge ebire bye ebikutte ne biyita, Ne waba amayinja ag'omuzira n'amanda ag'omuliro.

¹³ Era Mukama n'abwatuka mu ggulu, N'oyo ali waggulu ennyo n'aleeta eddoboozi lye; Ne waba amayinja ag'omuzira n'amanda ag'omuliro.

¹⁴ N'alasa obusaale bwe n'abasaasaanya; N'alasa enjota nnyingi n'abeeraliikiriza.

¹⁵ Ensalosalo ez'amazzi ne ziryoka zirabika, Emisingi gy'ensi ne gyeruka, Mu kunenya kwo, ai Mukama, Mu kibuyaga ow'omukka ogw'ennyindo zo.

¹⁶ Yatuma okuva waggulu, n'antwala; N'ampalula mu mazzi amangi.

¹⁷Yamponya eri mulabe wange ow'amaanyi, N'eri abo abankyawa, kubanga bansinza amaanyi nze.

¹⁸Banjijira ku lunaku olw'akabi kange: Naye Mukama ye yannyweza.

¹⁹ Era n'anfulumya mu kifo ekigazi; Yamponya, kubanga yansanyukira.

²⁰ Mukama yampa empeera ng'obutuukirivu bwange bwe bwali; Ng'emikono gyange bwe giri emirungi, bw'ansasudde.

²¹ Kubanga nakwata amakubo ga Mukama, Ne ssireka Katonda wange n'obubi.

²²Kubanga emisango gye gyonna gyali mu maaso gange, So amateeka ge saagaggyaawo gye ndi.

²³ Era nali eyatuukirira gy'ali. Ne nneekuuma mu bubi bwange.

²⁴Mukama kyavudde ansasula, ng'obutuukirivu bwange bwe buli, Emikono gyange nga bwe giri emirungi mu maaso ge.

²⁵ Eri ow'ekisa oneeraga ow'ekisa; Eri eyatuukirira oneeraganga eyatuukirira;

²⁶ Eri omulongoofu oneeraganga omulongoofu; N'eri omukakanyavu oneeraganga aziyiza.

²⁷ Kubanga onoolokolanga abantu abajoogebwa; Naye amaaso ag'amalala onoogatoowazanga.

²⁸ Kubanga ggwe olikoleeza ettabaaza yange. Mukama Katonda wange alimulisa mu kizikiza kyange.

²⁹Kubanga mu kubeerwa kwo nnumba ekibiina; Era mu kuyamba kwa Katonda wange mbuuka ekigo.

³⁰ Katonda, ekkubo lye lyatuukirira: Ekigambo kya Mukama kyakettebwa; Oyo ye ngabo y'abo bonna abamwesiga.

³¹ Kubanga ani Katonda, wabula Mukama? Era ani olwazi, wabula Katonda waffe?

³² Katonda ansibya amaanyi, Era atuukiriza ekkubo lyange.

³³ Afuula ebigere byange ng'eby'empeewo: Era angulumiza mu bifo byange ebya waggulu.

³⁴ Anjigiriza engalo zange okulwana; Emikono gyange ne gireega omutego ogw'ekikomo.

³⁵ Era ompadde engabo ey'obulokozi bwo: N'omukono gwo ogwa ddyo gumpaniridde, N'obuwombeefu bwo bungulumizizza.

³⁶ Ongaziyirizza ekkubo ery'ebigere byange, N'ebisinziiro byange tebiseereranga.

³⁷Ndigoberera abalabe bange, ne mbatuukako: So ssirikomawo nga tebannazikirizibwa.

³⁸Ndibafumitira ddala ne batayinza kuyimuka: Baligwa wansi w'ebigere byange.

³⁹Kubanga onsibye amaanyi ag'okulwana: Obafukamizza mu maaso gange abannyimukirako.

⁴⁰ Era abalabe bange obakyusizza amabega gaabwe gye ndi, Ndyoke nzikirize abankyawa.

⁴¹ Baakoowoola, naye tewaali mulokozi: Baakoowoola Mukama, naye n'atabaddamu.

⁴²Ne ndyoka mbasekulasekula ng'enfuufu etwalibwa empewo: Ne mbasuula ng'ebitosi eby'omu nguudo.

⁴³ Omponyezza mu kuyomba kw'abantu; Onfudde omutwe gw'amawanga; Abantu be ssaamanyanga balimpeereza.

⁴⁴Bwe baliwulira ebigambo byange, ne balyoka baŋŋondera: Bannaggwanga balinjeemulukukira.

⁴⁵ Bannaggwanga baliggwaawo, Baliva mu bifo byabwe eby'okwekwekamu nga bakankana.

⁴⁶Mukama mulamu; olwazi lwange atenderezebwe; Era agulumizibwe Katonda ow'obulokozi bwange:

⁴⁷ Ye Katonda ampalanira eggwanga, Era awangula amawanga ngafuge.

⁴⁸ Amponya eri abalabe bange: Weewaawo, ongulumiza ku abo abannyimukirako: Ondokola eri omuntu ow'ekyejo.

⁴⁹ Kyennaavanga nkwebaza ggwe, ai Mukama, mu mawanga, Naayimbanga okutendereza erinnya lyo.

⁵⁰ Obulokozi bukulu bw'awa kabaka we; Era amukolera eby'ekisa oyo gwe yasiiga amafuta, Dawudi n'ezzadde lye, emirembe n'emirembe.