Read luganda Zabbuli 2 Bible Online

Zabbuli 2 - luganda bible

Zabbuli 2

¹ Kiki ekibagugumusizza ab'amawanga, N'abantu kiki ekibalowoozesezza ekitaliimu?

² Bakabaka ab'ensi beeteeseteese, N'abafuga bateesezza ebigambo wamu, Ku Mukama ne ku Masiya we nga boogera nti

³ Ka tumenyemenye enjegere zaabwe, Tusuule wala emigwa gyabwe.

⁴ Atuula mu ggulu aliseka, Mukama alibaduulira.

⁵Mu biro biri alibagamba mu busungu bwe, Alibateganya mu kiruyi kye ekingi:

⁶ Naye naateeka kabaka wange Ku lusozi lwange olutukuvu Sayuuni.

⁷ Ekiragiro ndikibuulira: Mukama yaŋŋamba nti Ggwe oli mwana wange; Leero nkuzadde.

⁸ Onsabe nze, nange ndikuwa amawanga okubeera obusika bwo, N'ensonda ez'ensi okubeera amatwale go.

⁹ Olibimenya n'omuggo ogw'ekyuma; Olibyasayasa ng'entamu ey'omubumbi.

¹⁰Kale kaakano mubeere n'amagezi, mmwe bakabaka: Muyige, mmwe abasala omusango gw'ensi.

¹¹ Muweereze Mukama n'okutya, Era musanyuke n'okukankana.

¹² Munywegere omwana, aleme okusunguwala, nammwe ne mubula mu kkubo, Kubanga obusungu bwe bulibuubuuka mangu. Balina omukisa bonna abamweyuna ye.