Read luganda Zabbuli 21 Bible Online

Zabbuli 21 - luganda bible

Zabbuli 21

¹Ya mukulu w'abayimbi. Zabbuli ya Dawudi. Kabaka anaasanyukiranga amaanyi go, ai Mukama; N'obulokozi bwo ng'anaabujagulizanga nnyo!

² Omuwadde omutima gwe kye gwagala, So tomummye emimwa gye kye gisabye. (Seera)

³ Kubanga omusisinkanye n'eby'omukisa eby'obulungi: Omuteekako ku mutwe gwe engule ey'ezaabu ennungi.

⁴Yakusaba obulamu, n'obumuwa; Era n'ennaku ennyingi ez'emirembe n'emirembe.

⁵ Ekitiibwa kye kingi mu bulokozi bwo: Ekitiibwa n'obukulu obimussaako.

⁶ Kubanga omuteekawo okuba omukisa omungi emirembe gyonna: Omusanyusa essanyu mu maaso go.

⁷ Kubanga kabaka yeesiga Mukama, N'olw'ekisa ky'oyo ali waggulu ennyo taasagaasaganenga.

⁸Omukono gwo gulituuka ku balabe bo bonna: Omukono gwo ogwa ddyo gulituuka ku abo abakukyawa.

⁹ Olibafaananya ng'ekikoomi ekyaka mu biro eby'obusungu bwo. Mukama alibamira mu kiruyi kye, N'omuliro gulibalya.

¹⁰ Ebibala byabwe olibizikiriza ku nsi, N'ezzadde lyabwe mu baana b'abantu.

¹¹Kubanga baakuteeseza obubi: Baasala olukwe, lwe bataayinza kukola.

¹² Kubanga olibazza ennyuma, Oliteekateeka engoye zo ez'omutego ku maaso gaabwe.

¹³Ogulumizibwenga, ai Mukama, mu maanyi go: Tulyoke tuyimbenga tutenderezenga obuyinza bwo.