Read luganda Zabbuli 22 Bible Online

Zabbuli 22 - luganda bible

Zabbuli 22

¹Ya mukulu w'abayimbi; ey'ekya Ayijeresi-kassakali. Zabbuli ya Dawudi. Katonda wange, Katonda wange, kiki ekikundesezza? Lwaki okubeera ewala obutanzibira, obutawulira bigambo eby'okukaaba kwange?

² Ai Katonda wange, nkoowoola emisana, naawe n'otoddamu; Era n'ekiro, so ssisirika.

³ Naye ggwe oli mutukuvu, Ggwe atuula mu matendo ga Isiraeri.

⁴Bajjajja baffe baakwesiganga ggwe: Beesiganga, naawe n'obawonya.

⁵ Baakukoowoolanga ggwe, ne bawonyezebwanga: Baakwesiganga ggwe, ne batakwasibwanga nsonyi.

⁶ Naye nze ndi lusiriŋŋanyi, so ssiri muntu; Abasajja gwe bavuma, n'abantu gwe banyooma.

⁷ Bonna abandaba bansekerera ne banduulira: Bansooza n'emimwa gyabwe, banyeenya omutwe, nga boogera nti

⁸ Yeeweeyo eri Mukama; ye amulokole: Amuwonye, kubanga amusanyukira.

⁹ Naye ggwe wanziya mu lubuto lwa mmange: Ggwe wanneesiza bwe nnali nga nkyali ku mabeere ga mmange.

¹⁰ Neeyuna ggwe okuva mu kuzaalibwa kwange: Ggwe oli Katonda wange okuva mu lubuto lwa mmange.

¹¹ Tombeera wala; kubanga akabi kali kumpi; Kubanga tewali anannyamba.

¹²Zisseddume nnyingi zinneetoolodde: Zisseddume ez'amaanyi ez'e Basani zinzingizizza.

¹³ Banjasamidde akamwa kaabwe, Ng'empologoma etaagulataagula ewuluguma.

¹⁴ Nfukibwa ng'amazzi, N'amagumba gange gonna gasowose. Omutima gwange guli ng'obubaane; Gusaanuuse wakati mu byenda byange.

¹⁵ Amaanyi gange gakaliridde ng'olugyo; N'olulimi lwange lwegatta n'emba zange; Era ondeese mu nfuufu ey'okufa.

¹⁶ Kubanga embwa zinneetoolodde: Ekibiina ky'abo abakola obubi bantaayizizza; Bampummudde engalo zange n'ebigere byange.

¹⁷ Nnyinza okubala amagumba gange gonna; Bantunuulira, banvulumulira amaaso:

¹⁸ Bagabana ebyambalo byange, Ne bakuba akalulu ku lugoye lwange

¹⁹ Naye tobeera wala, ai Mukama: Ai ggwe annyamba, yanguya okunzibira.

²⁰ Wonya emmeeme yange eri ekitala; Ne kaganzi kange eri amaanyi g'embwa.

²¹ Ondokole mu kamwa k'empologoma; Era ne mu mayembe g'embogo wanziramu.

²² Naabuuliranga erinnya lyo eri baganda bange: Wakati mu kibiina naakutenderezanga.

²³Mmwe abatya Mukama, mumutenderezenga; Mmwe mwenna ezzadde lya Yakobo, mumugulumizenga; Mumutyenga mmwe mwenna ezzadde lya Isiraeri.

²⁴ Kubanga teyanyooma so teyakyawa nnaku z'oyo anakuwala; So teyamukisa amaaso ge; Naye bwe yamukoowoola, n'awulira.

²⁵ Mu ggwe mwe muva ettendo lyange mu kibiina ekinene: Ndisasula obweyamo bwange mu maaso g'abo abamutya.

²⁶ Abawombeefu balirya ne bakkuta: Balitendereza Mukama abamunoonya: Omutima gwammwe gubeerenga mulamu emirembe gyonna.

²⁷ Enkomerero zonna ez'ensi zirijjukira ne zikyukira Mukama: N'ebika byonna eby'amawanga birisinza mu maaso go.

²⁸ Kubanga obwakabaka bwa Mukama: Naye ye afuga amawanga.

²⁹ Abagevvu bonna ab'ensi balirya ne basinza: N'abo abakka mu nfuufu balimufukaamirira, Ye atayinza kuwonya mmeeme ye okufa.

³⁰ Ezzadde lirimuweereza; Kiribuulirwa ku Mukama okutuusa ku mirembe egigenda okujja.

³¹Balijja ne babuulira obutuukirivu bwe Eri abantu abalizaalibwa, nga ye abukola.