Read luganda Zabbuli 26 Bible Online

Zabbuli 26 - luganda bible

Zabbuli 26

¹Zabbuli ya Dawudi. Onsalire omusango, ai Mukama, kubanga natambuliranga mu butuukirivu bwange: Era neesiganga Mukama obutabuusabuusa.

² Onkebere, ai Mukama, onkeme; Ongezeeko emmeeme yange n'omutima gwange.

³ Kubanga ekisa kyo kiri mu maaso gange; Era natambuliranga mu mazima go.

⁴Saatuulanga wamu na bantu abataliimu; So ssiiyingirenga wamu na bakuusakuusa.

⁵ Ekibiina ky'abo abakola obubi nkikyawa, So siituulenga wamu na babi.

⁶ Naanaabanga mu ngalo zange mu butayonoona; Bwe nneetooloolanga bwe ntyo ekyoto kyo, ai Mukama:

⁷ Ndyoke mpulirizenga eddoboozi ery'okwebaza, Njogerenga ku bikolwa byo byonna eby'ekitalo.

⁸ Mukama, njagala ekisulo eky'omu nnyumba yo, N'ekifo ekitiibwa kyo kye kituulamu.

⁹ Tonoga mmeeme yange wamu n'abalina ebibi, Newakubadde obulamu bwange wamu n'abantu ab'omu nsi:

¹⁰ Emikono gyabwe girimu ettima, N'omukono gwabwe ogwa ddyo gujjudde enguzi.

¹¹ Naye nze naatambuliranga mu butuukirivu bwange: Onnunule, era onsaasire.

¹² Ekigere kyange kiyimiridde mu kifo ekitereevu: Mu bibiina neebazanga Mukama.