Read luganda Zabbuli 33 Bible Online

Zabbuli 33 - luganda bible

Zabbuli 33

¹ Musanyukire Mukama, mmwe abatuukirivu: Okutendereza kusaanira abalina omwoyo ogw'amazima.

² Mumwebaze Mukama n'ennanga: Muyimbe okumutendereza n'ennanga ey'engoye kkumi.

³ Mumuyimbire oluyimba oluggya; Mukube ennanga n'amagezi n'eddoboozi ddene.

⁴Kubanga ekigambo kya Mukama kigolokofu; N'omulimu gwe gwonna (agukola) mu bwesigwa.

⁵ Ayagala obutuukirivu n'amazima: Ensi ejjudde ekisa kya Mukama.

⁶ Mu kigambo kya Mukama eggulu lyakolebwa; N'eggye lyamu lyonna (lyakolebwa) n'omukka ogw'akamwa ke.

⁷ Amazzi ag'omu nnyanja agakuŋŋaanya ng'entuumo: Atereka amadubi mu mawanika.

⁸Ensi zonna zityenga Mukama: Bonna abali mu nsi zonna bamukankanirenga.

⁹ Kubanga yayogera ne kikolebwa; Yalagira ne kinywera.

¹⁰ Mukama aggyawo okuteesa kw'amawanga: Adibya ebirowoozo by'abantu.

¹¹ Okuteesa kwa Mukama kunyweera ennaku zonna, N'ebirowoozo by'omutima gwe okutuusa emirembe gyonna.

¹² Eggwanga eririna Mukama okuba Katonda waalyo liweereddwa omukisa; Abantu be yalonda okuba obusika bwe ye.

¹³ Mukama alengera ng'ayima mu ggulu; Atunuulira abaana b'abantu bonna;

¹⁴ Ng'ayima mu kifo eky'ekisulo kye alaba Ku abo abali mu nsi bonna;

¹⁵ Abumba emitima gyabwe bonna, Alowooza ebikolwa byabwe byonna.

¹⁶ Tewali kabaka alokoka olw'eggye okuba eringi: Omuzira tawonyezebwa maanyi mangi.

¹⁷ Embalaasi kye kintu ekitaliimu ku bulokozi: So teewonyenga muntu olw'amaanyi gaayo amangi.

¹⁸ Laba, eriiso lya Mukama liri ku abo abamutya, Ku abo abasuubira mu kusaasira kwe;

¹⁹ Okuwonyanga emmeeme yaabwe okufa, N'okubakuumanga abalamu mu njala.

²⁰ Emmeeme yaffe erindiridde Mukama: Oyo ye mubeezi waffe, era ye ngabo yaffe.

²¹ Kubanga omutima gwaffe gunaasanyukira oyo, Kubanga twesize erinnya lye ettukuvu.

²²Okusaasira kwo, ai Mukama, kubeerenga ku ffe, Nga ffe bwe tusuubira mu ggwe.