Read luganda Zabbuli 34 Bible Online

Zabbuli 34 - luganda bible

Zabbuli 34

¹Zabbuli ya Dawudi; bwe yawaanyisa empisa ze mu maaso ga Abimereki, eyamugoba, n'agenda. Neebazanga Mukama mu biro byonna: Ettendo lye liri mu kamwa kange bulijjo.

² Emmeeme yange eneenyumiririzanga mu Mukama: Abawombeefu baliwulira, balisanyuka.

³ Mumukuze Mukama wamu nange, Tugulumize erinnya lye fenna.

⁴ Nanoonya Mukama, n'anziramu, N'andokola mu kutya kwange kwonna.

⁵Baamutunuulira, ne balaba omusana: Era amaaso gaabwe tegaakwatibwenga nsonyi emirembe gyonna.

⁶ Omunaku ono yakoowoola, Mukama n'amuwulira, N'amulokola mu nnaku ze zonna.

⁷ Malayika wa Mukama asiisira okwetooloola abo abamutya, N'abalokola.

⁸ Mulege mutegeere Mukama nga mulungi: Aweereddwa omukisa oyo amwesiga.

⁹ Mutyenga Mukama, mmwe abatukuvu be: Kubanga tebabulwa kintu abamutya,

¹⁰ Obwana bw'empologoma bubulwa ne bulumwa enjala: Naye abanoonya Mukama tebaabulwenga kintu kirungi kyonna.

¹¹ Mujje, mmwe abaana abato, mumpulire: Naabayigirizanga okutya Mukama.

¹² Muntu ki ayagala obulamu, Era eyeegomba ennaku (ennyingi), alyoke alabe obulungi?

¹³ Ziyizanga olulimi lwo mu bubi, N'emimwa gyo obutoogeranga bukuusa.

¹⁴ Va mu bubi, okolenga obulungi; Noonyanga emirembe, ogigobererenga.

¹⁵ Amaaso ga Mukama galaba abatuukirivu, N'amatu ge gawulira okukaaba kwabwe.

¹⁶ Obwenyi bwa Mukama buba ku abo abakola obubi, Amalemu okujjukirwa kwabwe mu nsi.

¹⁷Abatuukirivu baakoowoola, Mukama n'awulira, N'abalokola mu nnaku zaabwe zonna.

¹⁸ Mukama ali kumpi n'abo abalina omutima ogumenyese. Era awonya abalina omwoyo oguboneredde.

¹⁹ Ebibonoobono eby'omutuukirivu bye bingi: Naye Mukama amulokola mu byonna.

²⁰ Akuuma amagumba ge gonna: Linnaago erimu terimenyeka.

²¹ Obubi bulitta omubi: N'abo abakyawa omutuukirivu balisingibwa omusango.

²² Mukama anunula emmeeme y'abaddu be: So tewali mu bo abamwesiga alisingibwa omusango.