Read luganda Zabbuli 38 Bible Online

Zabbuli 38 - luganda bible

Zabbuli 38

¹Zabbuli ya Dawudi, ey'okujjukiza. Ai Mukama, tonnenya mu busungu bwo: So tombuuliririra mu kiruyi kyo ekibuubuuka.

² Kubanga obusaale bwo bunkwatidde ddala, N'omukono gwo gunnyigirizza nnyo.

³ Temuli bulamu mu mubiri gwange olw'okunyiiga kwo; So temuli kuwona mu magumba gange olw'okwonoona kwange.

⁴ Kubanga obutali butuukirivu bwange buyiise ku mutwe gwange. Ng'omugugu omunene bunzitooweredde bunnemye.

⁵Ebiwundu byange biwunya era bivunze, Olw'obusirusiru bwange.

⁶ Nnumiddwa, nkutamizibbwa nnyo; Ntambula nga nkaaba obudde okuziba.

⁷ Kubanga ekiwato kyange kijjudde okwokya; So temuli bulamu mu mubiri gwange.

⁸Nnyongobera, mmenyesemenyese: Mpulugumye olw'okweraliikirira kw'omutima gwange.

⁹Mukama, bye njagala byonna biri mu maaso go; N'okusinda kwange tekukukisibwa.

¹⁰ Omutima gwange guntundugga, amaanyi gange gampweddemu: Omusana ogw'amaaso gange, era nagwo gumbuze.

¹¹ Abanjagala ne mikwano gyange beewala ekibonoobono kyange; Ne baganda bange bayimirira wala.

¹² Era n'abo abanjigganya obulamu bwange banteega; N'abo abaagala nze okulaba akabi boogera eby'ettima, Era balowooza eby'obulimba obudde okuziba.

¹³ Naye nze, ng'omuzibe w'amatu, ssiwulira; Era nninga omusiru atayasama kamwa ke.

¹⁴Mazima, nninga omuntu atawulira, Ne mu kamwa ke temuli kunenya.

¹⁵ Kubanga eri ggwe, ai Mukama, gye nsuubira: Oliddamu, ai Mukama Katonda wange.

¹⁶ Kubanga nayogera nti Baleme okunsanyukirako: Ekigere kyange bwe kiseerera, banneegulumirizaako.

¹⁷ Kubanga nze ndi kumpi n'okuwenyera, N'ennaku zange ziri mu maaso gange bulijjo.

¹⁸ Kubanga naayatulanga obutali butuukirivu bwange; Naanakuwalanga olw'okwonoona kwange.

¹⁹Naye abalabe bange balamu, balina amaanyi: N'abo abankyawa olw'obulimba beeyongedde.

²⁰ Era n'abo abasasula obubi olw'obulungi Be balabe bange, kubanga ngoberera ebigambo ebirungi.

²¹ Tondeka, ai Mukama: Ai Katonda wange, tombeera wala.

²² Yanguwa okunnyamba, Ai Mukama, obulokozi bwange.