Read luganda Zabbuli 41 Bible Online

Zabbuli 41 - luganda bible

Zabbuli 41

¹Ya mukulu w'abayimbi. Zabbuli ya Dawudi. Aweereddwa omukisa oyo ajjukira omwavu: Mukama alimulokola ku lunaku olw'akabi.

² Mukama anaamukuumanga, anaamuwonyanga, era anaaweebwanga omukisa mu nsi; So tomuwangayo eri abalabe be okumukola bye baagala.

³Mukama anaamujjanjabanga ng'ayongobera ku kitanda: Ggwe olongooseza ddala ekiriri kye bw'alwala.

⁴ Nayogera nti Ai Mukama, onsaasire: Omponye emmeeme yange: kubanga nnyonoonye ggwe.

⁵Abalabe bange banjogerako obubi nti Alifa ddi, erinnya lye ne libula?

⁶ Era ne bw'ajja okundaba, ayogera ebitaliimu; Omutima gwe gwekuŋŋaanyiza obutali butuukirivu: Bw'ava mu nnyumba, abubuulira.

⁷Bonna abankyawa bangeyera wamu: Bateesa ebigambo okunkola akabi.

⁸Boogera nti Endwadde embi emukutte: Kaakano bw'agalamidde, tagenda kugolokoka nate.

⁹ Era ne munnange mukwano gwange nze, gwe nneesiga, eyalyanga ku mmere yange, Ansitulidde ekisinziiro kye.

¹⁰Naye ggwe, ai Mukama, onsaasire, ongolokose, Ndyoke mbawalanire eggwanga.

¹¹ Kyenvudde mmanya ng'onsanyukira, Kubanga omulabe wange tampangula.

¹² Naye nze, onnyweza nze mu butuukirivu bwange, Era onteeka mu maaso go ennaku zonna.

¹³ Atenderezebwenga Mukama, Katonda wa isiraeri, Okuva mu mirembe gyonna okutuusa emirembe n'emirembe. Amiina, era Amiina.