Read luganda Zabbuli 44 Bible Online

Zabbuli 44 - luganda bible

Zabbuli 44

¹Ya mukulu w'abayimbi; zabbuli ya batabani ba Koola. Masukiri. Twawuliranga n'amatu gaffe, ai Katonda, bajjajja baffe baatubuuliranga, Emirimu gye wakolanga mu nnaku zaabwe, mu nnaku ez'edda.

² Amawanga wagagobamu n'omukono gwo, n'obasigamu bo; Wabonyaabonya amawanga, n'ogasaasaanyiza ddala.

³ Kubanga tebaalya nsi olw'ekitala kyabwe, Newakubadde omukono gwabwe si gwe gwabalokola: Wabula omukono gwo ogwa ddyo n'engalo zo, n'omusana ogw'amaaso go, Kubanga baalaba ekisa eri ggwe.

⁴ Ggwe oli kabaka wange, ai Katonda: Lagira obulokozi eri Yakobo.

⁵ Ku bubwo tulisindika abalabe baffe wansi: Olw'erinnya lyo tulirinnyirira abo abatugolokokerako ffe.

⁶ Kubanga ssiryesiga mutego gwange, So ekitala kyange si kye kirindokola.

⁷Naye ggwe watulokola eri abalabe baffe, Era wabaswaza abatukyawa.

⁸ Mu Katonda mwe twenyumiririza obudde okuziba, Era tuneebazanga erinnya lyo emirembe gyonna. (Seera)

⁹ Naye kaakano otusudde wala, otukwasizza ensonyi; So totabaala n'eggye lyaffe.

¹⁰ Otuzza nnyuma eri abalabe: N'abo abatukyawa beenyagira.

¹¹ Watuwaayo ng'endiga okuba ennyama; Watusaasaanya mu mawanga.

¹² Abantu bo obatundira bwereere, So n'omuwendo gwabwe togwongezezza ku bugagga bwo.

¹³ Otufuula ekivume eri abaliraanwa baffe, Ekinyoomebwa, ekisekererwa eri abo abatwetoolodde.

¹⁴ Otufuula olugero mu mawanga, Okunyeenyezebwa kw'omutwe mu bantu.

¹⁵Obudde okuziba okunyoomebwa kwange kunjolekedde, N'ensonyi ez'amaaso gange zinsaanikidde,

¹⁶ Olw'eddoboozi ly'oyo aboggola, avuma; Olw'omulabe n'olw'oyo awalana eggwanga.

¹⁷ Ebyo byonna bitutuuseeko; naye tetukwerabidde, So tetukoze bya bulimba mu ndagaano yo.

¹⁸ Omutima gwaffe teguzze nnyuma, So ebigere byaffe tebikyamye kuva mu kkubo lyo;

¹⁹Ne we watumenyaamenya ennyo mu kifo eky'ebibe, N'otusaanikiza ekisiikirize eky'okufa.

²⁰Oba nga twerabidde erinnya lya Katonda waffe, Oba tugolodde emikono gyaffe eri katonda omuggya,

²¹ Ekyo Katonda talikikenneenya? Kubanga ebyama eby'omu mutima abimanyi.

²² Era tuttibwa obudde okuziba okulangibwa ggwe; Tuli ng'endiga ez'okusalibwa.

²³ Zuukuka, kiki ekikwebasa, ai Mukama? Golokoka, totusuulanga wala emirembe gyonna.

²⁴ Kiki ekikukwesezza amaaso go, N'ebibonoobono byaffe n'okujoogebwa n'obyerabira?

²⁵ Kubanga emmeeme yaffe ekutamye mu nfuufu: Olubuto lwaffe lwegasse n'ettaka.

²⁶ Golokoka okutuyamba, Otununule olw'ekisa kyo.