Read luganda Zabbuli 48 Bible Online

Zabbuli 48 - luganda bible

Zabbuli 48

¹Oluyimba; zabbuli ya batabani ba Koola. Mukama mukulu, agwanira okutenderezebwa ennyo, Mu kibuga kya Katonda waffe, ku lusozi lwe olutukuvu.

² Olusozi Sayuuni lulungi mu kugulumira kwalwo, Lye ssanyu ery'ensi yonna, ku njuyi ez'obukiika obwa kkono, Ekibuga kya kabaka omukulu.

³ Katonda yeetegeezezza mu mayumba gaakyo nga kye kiddukiro.

⁴ Kubanga, laba, bakabaka baakuŋŋaana, Ne bayitamu wamu.

⁵Ne bakiraba, ne balyoka beewuunya; Ne batya, ne baanguwa okugenda.

⁶ Ensisi n'ebakwatira omwo; N'okulumwa, ng'omukazi azaala.

⁷Omuyaga oguva ebuvanjuba Ogumenyesa amaato ag'e Talusiisi.

⁸ Nga bwe twawuliranga, bwe twalaba bwe tutyo Mu kibuga kya Mukama w'eggye, mu kibuga kya Katonda waffe: Katonda anaakinywezanga emirembe gyonna. (Seera)

⁹Twajjuukirira ekisa kyo, ai Katonda, Wakati mu yeekaalu yo.

¹⁰ Ng'erinnya lyo bwe liri, ai Katonda, Ettendo lyo bwe liri bwe lityo okutuusa enkomerero y'ensi: Omukono gwo ogwa ddyo gujjudde obutuukirivu.

¹¹ Olusozi Sayuuni lusanyuke, Abawala ba Yuda bajaguze, Olw'emisango gyo.

¹²Mutambule okwetooloola Sayuuni, mukibunye: Mubale ebigo byakyo.

¹³ Mwekalirize enkomera zaakyo. Mulowooze amayumba gaakyo; Mulyoke mubibuulire emirembe egigenda okujja.

¹⁴ Kubanga Katonda oyo ye Katonda waffe emirembe n'emirembe: Ye anaabeeranga omusaale waffe okutuusa ku kufa.