Read luganda Zabbuli 49 Bible Online

Zabbuli 49 - luganda bible

Zabbuli 49

¹Ya mukulu w'abayimbi; zabbuli ya batabani ba Koola. Kino mukiwulire, mmwe amawanga gonna; Mutege okutu, mmwe mwenna abali mu nsi:

²Abakopi era n'abakulu, Abagagga n'abaavu awamu.

³Akamwa kange kanaayogera amagezi; N'omutima gwange gunaalowooza eby'okumanya.

⁴ Okutu kwange naakutegera olugero: Naabikkula ekigambo kyange ekizibu n'ennanga.

⁵Lwaki nze okutya mu nnaku ez'akabi, Obutali butuukirivu bwe buneetooloola ku bisinziiro byange?

⁶ Abeesiga obugagga bwabwe, Ne beenyumiriza olw'ebintu byabwe ebingi;

⁷ Mu abo siwali ayinza okununula muganda we n'akatono, Newakubadde okuwa Katonda omuwendo gwe:

⁸ (Kubanga ekinunulo eky'emmeeme yaabwe kizibu, Era ekigwanira okulekebwanga emirembe gyonna:)

⁹ Alyoke awangaalenga ennaku zonna, Alemenga okulaba okuvunda,

¹⁰ Kubanga alaba ng'ab'amagezi bafa, Atamanyi n'omusirusiru bazikirira wamu, N'obugagga bwabwe ne babulekera abalala.

¹¹ Balowooza munda ng'ennyumba zaabwe za nnaku zonna, Ebifo byabwe bya mirembe gyonna; Batuuma ensi zaabwe amannya gaabwe bo.

¹² Naye omuntu tabeerera mu kitiibwa: Ali ng'ensolo ezizikirira.

¹³ Ekkubo lyabwe eryo bwe busirusiru bwabwe: Naye abantu ababaddirira basiima ebigambo byabwe: (Seera)

¹⁴ Bateekerwawo magombe ng'ekisibo; Okufa kunaabeeranga omusumba waabwe: Ab'amazima banaabafuganga obudde bwe bulikya; N'obulungi bwabwe buliba obw'emagombe, okubulya, buleme okubeera n'ekifo eky'okutuulamu.

¹⁵ Naye Katonda alinunula emmeeme yange mu maanyi ag'emagombe; Kubanga ye alinzikiriza. (Seera)

¹⁶Totyanga ggwe omuntu bw'agaggawala, Ekitiibwa eky'ennyumba ye bwe kyeyongera:

¹⁷ Kubanga bw'alifa talitwala kintu: Ekitiibwa kye tekirikka kumugoberera:

¹⁸ Newakubadde nga yayita emmeeme ye ey'omukisa bwe yali ng'akyali mulamu, Era abantu bakutendereza bwe weekolera wekka obulungi,

¹⁹Alikka mu mirembe gya bajjajja be; Tebaliraba musana nate.

²⁰Omuntu alina ekitiibwa n'atategeera, Ali ng'ensolo ezizikirira.