Read luganda Zabbuli 51 Bible Online

Zabbuli 51 - luganda bible

Zabbuli 51

¹Ya mukulu w'abayimbi. Zabbuli ya Dawudi: Nasani nnabbi bwe yajja gy'ali, bwe yali ng'amaze okuyingira eri Basuseba. Onsaasire, ai Katonda, mu kisa kyo; Mu bungi obw'okusaasira kwo sangula ebyonoono byange byonna.

² Onnaalize ddala mu bubi bwange, Onnongoose mu kwonoona kwange.

³ Kubanga njatula ebyonoono byange; N'ekibi kyange kiri mu maaso gange bulijjo.

⁴ Ggwe, ggwe wekka, ggwe nnayonoona. Ne nkola ekibi mu maaso go: Obeere omutuukirivu bw'oyogera, Osinge omusango bw'osala.

⁵ Laba, nze natondebwa mu bubi; Ne mu kwonoona mmange mwe yanzaalira.

⁶ Laba, ggwe oyagala eby'omunda eby'amazima; Era mu mwoyo ogutalabika onommanyisa amagezi.

⁷ Ontukuze n'ezoobu, nange naaba mulungi: Onnaaze, nange naaba mutukuvu okusinga omuzira.

⁸Ompulize essanyu n'okwesiima; Amagumba ge wamenya gasanyuke.

⁹ Okise amaaso go mu bibi byange, Osangule ebyonoono byange byonna.

¹⁰ Ontondemu omutima omulongoofu, ai Katonda; Onzizeemu omwoyo omulungi mu nda yange.

¹¹ Tongoba w'oli; So tonziyaako omwoyo gwo omutukuvu.

¹² Onkomezeewo essanyu ery'obulokozi bwo: Onnyweze n'omwoyo ogw'eddembe.

¹³ Ne ndyoka njigiriza amakubo go aboonoonyi; N'abalina ebibi balikyukira gy'oli.

¹⁴ Omponye mu musango gw'omusaayi, ai Katonda, ggwe Katonda ow'obulokozi bwange; Olulimi lwange luliyimba nnyo obutuukirivu bwo.

¹⁵Ai Mukama, yasamya emimwa gyange; N'akamwa kange kalyolesa ettendo lyo.

¹⁶ Kubanga tosanyukira ssaddaaka; naakukuwadde; Ebiweebwayo ebyokebwa tebikuwoomera.

¹⁷ Ssaddaaka za Katonda ye mmeeme emenyese: Omutima ogumenyese era oguboneredde, ai Katonda, toogugayenga.

¹⁸Okole bulungi Sayuuni, nga bw'oyagala: Okolere Yerusaalemi bbugwe.

¹⁹ N'olyoka osanyukira ssaddaaka ez'obutuukirivu, eby'okwokya n'eby'okwokya ebiramba: Ne balyoka bawaayo ente ku kyoto kyo.