Read luganda Zabbuli 59 Bible Online

Zabbuli 59 - luganda bible

Zabbuli 59

¹Ya mukulu w'abayimbi; ey'ekyalutasukesi. Zabbuli ya Dawudi: Mikutamu: Sawulo bwe yatuma, ne balabirira ennyumba okumutta. Ondokole mu balabe bange, ai Katonda wange: Ongulumize eri abo abangolokokerako.

²Ondokole eri abo abakola obutali butuukirivu, Omponye eri abo abaagala omusaayi.

³ Kubanga, laba, bateega emmeeme yange; Ab'amaanyi bakuŋŋaana okunnumba: Si lwa kyonoono kyange, so si lwa kibi kyange, ai Mukama.

⁴Baddukana, beeteekateeka nga sikoze bubi: Ozuukuke onnyambe, olabe.

⁵ Ggwe, ai Mukama Katonda ow'eggye, Katonda wa Isiraeri, Ogolokoke obuulirire amawanga gonna: Tosaasiranga muntu yenna omwonoonyi omubi. (Seera)

⁶Bakomawo akawungeezi, bakaaba ng'embwa, Beetooloola ekibuga.

⁷ Laba, beebajjagala n'akamwa kaabwe; Ebitala biri mu mimwa gyabwe: Kubanga boogera nti Ani awulira?

⁸ Naye ggwe, Mukama, olibasekerera; Oliduulira amawanga gonna.

⁹ Ai amaanyi gange, naakulindiriranga ggwe: Kubanga Katonda kye kigo kyange ekiwanvu.

¹⁰ Katonda ow'okusaasirwa kwange anankulemberanga: Katonda anandabyanga bye njagala nga bituuse ku balabe bange.

¹¹ Tobatta, abantu bange baleme okwerabira: Obasaasaanye n'amaanyi go, obatoowaze, Ai Mukama engabo yaffe.

¹²Olw'okwonoona kw'akamwa kaabwe, olw'ebigambo by'emimwa gyabwe, Bakwatibwe nga beenyumiriza, Era n'olw'okukolima n'obulimba bye boogera.

¹³ Obazikirize mu busungu, obazikirize, balemenga okubaawo nate: Era bategeerenga nga Katonda afugira mu Yakobo, Okutuuka ku nkomerero z'ensi. (Seera)

¹⁴Era akawungeezi bakomewo, bakaabe ng'embwa, Beetooloole ekibuga.

¹⁵ Balitambulatambula nga banoonya emmere, Balikeesa obudde bwe batalikkuta.

¹⁶Naye nze naayimbanga ku maanyi go; Weewaawo, naayimbiranga ddala ku kusaasira kwo enkya: Kubanga wali kigo kyange ekiwanvu, N'ekiddukiro ku lunaku olw'okutegana kwange.

¹⁷Ggwe, ai amaanyi gange, gwe nnaayimbiranga okukutendereza: Kubanga Katonda kye kigo kyange ekiwanvu, Katonda wa kusaasirwa kwange.