Read luganda Zabbuli 69 Bible Online

Zabbuli 69 - luganda bible

Zabbuli 69

¹Ya mukulu w'abayimbi; ey'ekisosannimu. Zabbuli ya Dawudi. Ndikola, ai Katonda; Kubanga amazzi gayingidde ne gatuuka ku mmeeme yange.

² Ntubira mu bitosi ebiwanvu awatali kuyimirira: Ntuuse mu buziba amazzi amangi we gampitirako.

³ Okukaaba kwange kunkooyesezza; obulago bwange bukaze: Amaaso gange ganzibye nga nnindirira Katonda wange.

⁴ Abankyayira obwereere basinga enviiri ez'okumutwe gwange obungi: Abaagala okunzikiriza, kubanga be balabe bange awatali nsonga, ba maanyi: Ne ndyoka nziza kye saabaggyaako.

⁵Ai Katonda, ggwe omanyi obusirusiru bwange: N'okwonoona kwange tekukisibwa ggwe.

⁶Abakulindirira ggwe balemenga okukwatibwa ensonyi ku lwange, ai Mukama Katonda ow'eggye: Abakunoonya ggwe balemenga okuswazibwa ku lwange, ai Katonda wa Isiraeri.

⁷ Kubanga banvuma okunnanga ggwe; Ensonyi zibisse amaaso gange.

⁸ Nfuuse munnaggwanga eri baganda bange, Era atali mumanyi eri abaana ba mmange.

⁹ Kubanga obuggya obw'ennyumba yo bundidde; N'ebivume by'abo abakuvuma ggwe binguddeko.

¹⁰ Bwe nnakaaba amaziga, emmeeme yange n'esiiba enjala, Ekyo kye kyanvumya.

¹¹Bwe nnayambala ebibukutu, Ne mbafuukira eŋŋombo.

¹² Abatuula mu mulyango banjogerako, Era ndi luyimba lwa batamiivu.

¹³ Naye nze, okusaba kwange kuli eri ggwe, ai Mukama, mu kiseera eky'okukkiririzaamu: Ai Katonda, mu kusaasira kwo okungi, Onziremu mu mazima ag'obulokozi bwo.

¹⁴ Onnyinyulule mu bitosi, nneme okutubira: Ndokoke eri abo abankyawa ne mu mazzi ag'eddubi.

¹⁵Amazzi amangi galeme okumpangula, Newakubadde obunnya buleme okunzibira akamwa kaabwo.

¹⁶ Onziremu, ai Mukama; kubanga ekisa kyo kirungi: Ng'okusaasira kwo bwe kuli okungi, onkyukire.

¹⁷ So tokisa amaaso go omuddu wo; Kubanga ndi mu nnaku; oyanguwe okunziramu.

¹⁸Osemberere emmeeme yange, oginunule: Ompe eddembe olw'abalabe bange.

¹⁹ Ggwe omanyi bwe nvumibwa, bwe nkwatibwa ensonyi, bwe nnyoomebwa: Abalabe bange bonna bali mu maaso go.

²⁰ Okuvumibwa kumenye omutima gwange; era njijudde ennaku: Nnoonyezza anansaasira, naye tewabadde n'omu: Era abanansanyusa, naye ne siraba.

²¹ Era bampa omususa okuba emmere yange; Era bwe nnalumibwa ennyonta ne bannywesa omwenge omukaatuufu.

²² Emmeeza yaabwe eri mu maaso gaabwe ebeerenga ekyambika gye bali; Era bwe baba mu mirembe, gifuukenga omutego.

²³ Amaaso gaabwe gabenga mu kizikiza, baleme okulaba; Okankanyenga ebiwato byabwe ennaku zonna.

²⁴Obafukengako ekiruyi kyo, N'obusungu bwo obukambwe bubatuukengako.

²⁵ Ennyumba yaabwe erekebwenga, So omuntu yenna alemenga okubeera mu weema zaabwe.

²⁶ Kubanga baayigganya oyo gw'okubye; Era boogera ku nnaku zaabo b'ofumise.

²⁷ Oyongerenga obubi ku bubi bwabwe: So balemenga okuyingira mu butuukirivu bwo.

²⁸ Basangulibwenga okuva mu kitabo ky'obulamu, So balemenga okuwandiikibwa awamu n'abatuukirivu.

²⁹ Naye nze ndi mwavu, munaku: Obulokozi bwo, ai Katonda, bungulumize waggulu.

³⁰ Naatenderezanga erinnya lya Katonda n'oluyimba, Naamugulumizanga n'okwebaza.

³¹ Era ebyo binaasanyusanga Mukama okusinga ente, Ente erina amayembe n'ebinuulo.

³² Abawombeefu bakirabye ne basanyuka: Mmwe abanoonya Katonda, omutima gwammwe gube omulamu.

³³ Kubanga Mukama awulira abaavu, So tanyooma basibe be.

³⁴ Eggulu n'ensi bimutenderezenga, Ennyanja ne byonna ebigitambuliramu.

³⁵ Kubanga Katonda alirokola Sayuuni, era alizimba ebibuga bya Yuda; Nabo balituula omwo, ne bagirya.

³⁶ Era n'ezzadde ly'abaddu be baligisikira; N'abo abaagala erinnya lye balituula omwo.