Read luganda Zabbuli 71 Bible Online

Zabbuli 71 - luganda bible

Zabbuli 71

¹ Ggwe, ai Mukama, ggwe nneesiga: Nnemenga okukwatibwa ensonyi ennaku zonna.

²Ondokole mu butuukirivu bwo, omponye: Ontegere okutu, ondokole.

³ Obeerenga gye ndi olwazi olw'okutuulangako, we nnaayinzanga okweyuna bulijjo: Walagira okundokola; Kubanga ggwe oli lwazi lwange era ekigo kyange.

⁴ Omponye, ai Katonda wange, mu mukono gw'omubi, Mu mukono gw'omuntu atali mutuukirivu, omukambwe.

⁵ Kubanga ggwe oli ssuubi lyange, ai Mukama Katonda: Ggwe gwe nneesiga okuva mu buto bwange.

⁶ Ggwe wampanirira okuva mu lubuto: Ggwe wanziya mu byenda bya mmange: Ggwe gwe nnaatenderezanga ennaku zonna.

⁷ Nninga ekitalo eri abantu abangi; Naye ggwe oli kiddukiro kyange eky'amaanyi.

⁸ Akamwa kange kanajjulanga ettendo lyo, N'ekitiibwa kyo okuzibya obudde.

⁹Tonsuula mu biro eby'obukadde; Tondekanga amaanyi gange bwe galimbula.

¹⁰ Kubanga abalabe bange banjogerako; N'abo abateega emmeeme yange bateesa wamu,

¹¹Nga boogera nti Katonda amulese: Mumugoberere mumukwate; kubanga tewali anaamuwonya.

¹² Ai Katonda, tombeera wala: Ai Katonda wange, yanguwa okunnyamba.

¹³ Bakwatibwe ensonyi bazikirire abakyawa emmeeme yange; Baswazibwe banyoomebwe abaagala okunkola obubi.

¹⁴Naye naasuubiranga ennaku zonna, Era naayongeranga okukutenderezanga bulijjo.

¹⁵ Akamwa kange kanaatenderanga obutuukirivu bwo, N'obulokozi bwo okuzibya obudde; Kubanga omuwendo gwabyo sigumanyi.

¹⁶Najjanga n'ebikolwa eby'amaanyi ebya Mukama Katonda: Naayogeranga ku butuukirivu bwo, ku bubwo bwokka.

¹⁷Ai Katonda, ggwe wanjigirizanga okuva mu buto bwange; Era okutuusa leero naabuuliranga ebikolwa byo eby'ekitalo.

¹⁸ Weewaawo, bwe ndiba nkaddiye era nga mmeze envi, ai Katonda, tondekanga; Okutuusa lwe ndibuulira amaanyi go emirembe egijja okubaawo, N'obuyinza bwo buli muntu agenda okujja.

¹⁹ Era n'obutuukirivu bwo, ai Katonda, bugulumivu nnyo: Ggwe eyakola ebikulu, Ai Katonda, afaanana nga ggwe ani?

²⁰ Ggwe eyatulaga ebibonoobono ebingi ebizibu, Olituzuukiza nate, Era olitulinnyisa nate okuva mu bya wansi by'ensi.

²¹Oyongerenga ggwe obukulu bwange, Okyukenga nate onsanyuse.

²² Era naakutenderezanga n'endere, Amazima go ge nnaatenderezanga, ai Katonda wange: Ggwe gwe nnaatenderezanga nga nnyimba mu nnanga, Ai ggwe Omutukuvu wa Isiraeri.

²³ Emimwa gyange ginaasanyukanga nnyo bwe nnaayimbanga okukutendereza; N'emmeeme yange gye wanunula.

²⁴ Era n'olulimi lwange lunaayogeranga ku butuukirivu bwo okuzibya obudde: Kubanga bakwatiddwa ensonyi, baswazibbwa abaagala okunkola obubi.