Read luganda Zabbuli 72 Bible Online

Zabbuli 72 - luganda bible

Zabbuli 72

¹Zabbuli ya Sulemaani. Owenga kabaka emisango gyo, ai Katonda Era owenga obutuukirivu bwo omwana wa kabaka.

² Anaasaliranga abantu bo emisango egy'obutuukirivu, N'abaavu bo egy'ensonga.

³ Ensozi zinaaleeteranga abantu emirembe, N'obusozi, mu butuukirivu.

⁴Anaasaliranga omusango abaavu ab'omu bantu, Anaalokolanga abaana b'abo abatalina bintu, Era anaamenyaamenyanga omujoozi.

⁵ Banaakutyanga ng'enjuba ekyaliwo, Era ng'omwezi gukyayaka, emirembe gyonna.

⁶ Alikka ng'enkuba bw'etonnya ku ssubi erisaliddwa: Ng'empandaggirize ezifukirira ensi.

⁷ Mu nnaku ze abatuukirivu banaalabanga omukisa, Era wanaabangawo emirembe emingi, okutuusa omwezi lwe guliggwaawo.

⁸ Era anaafuganga okuva ku nnyanja okutuuka ku nnyanja, Era okuva ku mugga okutuuka ku nkomerero z'ensi.

⁹ Abatuula mu ddungu balimufukaamirira; N'abalabe be balikomba enfuufu.

¹⁰ Bakabaka b'e Talusiisi n'ab'oku Bizinga banaaleetanga ebirabo: Bakabaka b'e Syeba n'ab'e Seeba banaawangayo ebitone.

¹¹ Weewaawo, bakabaka bonna banaavuunamiranga mu maaso ge: Amawanga gonna ganaamuweerezanga.

¹²Kubanga anaawonyanga omunafu bw'anaakaabanga: N'omwavu atalina mubeezi.

¹³Anaasaasiranga omwavu n'omunafu, N'emmeeme z'abanafu anaazirokolanga.

¹⁴ Anaanunulanga emmeeme zaabwe mu kujoogebwa n'ettima: N'omusaayi gwabwe gunaabanga gwa muwendo mungi mu maaso ge:

¹⁵ Era banaabanga balamu; naye anaaweebwanga ku zaabu ey'e Syeba: Era abantu banaamusabiranga bulijjo; Banaamwebazanga okuzibya obudde.

¹⁶ Wanaabangawo emmere enkalu nnyingi mu nsi ku ntikko y'ensozi; Ebibala byayo binaayuuganga nga Lebanooni: N'ab'ekibuga banaameranga ng'omuddo ogw'oku nsi.

¹⁷ Erinnya lye linaabeereranga emirembe gyonna; Erinnya lye linaalwangawo ng'enjuba: N'abantu banaalabanga omukisa mu ye; Amawanga gonna ganaamuyitanga wa Mukisa.

¹⁸ Yeebazibwenga Mukama Katonda, Katonda wa Isiraeri, Akola eby'amagero yekka:

¹⁹ N'erinnya lye ery'ekitiibwa lyebazibwenga emirembe gyonna; Era ensi zonna zijjuzibwenga ekitiibwa kye. Amiina, era Amiina.

²⁰Okusaba kwa Dawudi mutabani wa Yese kuwedde.