Read luganda Zabbuli 76 Bible Online

Zabbuli 76 - luganda bible

Zabbuli 76

¹Ya mukulu w'abayimbi; ey'ebintu eby'engoye. Zabbuli ya Asafu, oluyimba. MU Yuda Katonda amanyibwa: Erinnya lye kkulu mu Isiraeri.

² Era mu Salemi eweema ye mweri, N'ekifo kye ky'atuulamu mu Sayuuni.

³ Eyo gye yamenyera obusaale obw'omutego, Engabo, n'ekitala, n'olutalo. (Seera)

⁴Oli wa kitiibwa, osinga, okuva ku nsozi ez'omunyago.

⁵ Ab'emitima emizira banyagiddwa, beebase mu tulo twabwe; So mu bantu ab'amaanyi temuli abalabye emikono gyabwe.

⁶ Ggwe onenyezza, ggwe Katonda wa Yakobo, Eggaali era n'embalaasi n'ebyebasibwa otulo otw'okufa.

⁷ Ggwe, ggwe ogwanira okutiibwa: Era ani ayinza okuyimirira mu maaso go ng'omaze okusunguwala?

⁸ Wawuliza omusango nga guvudde mu ggulu; Ensi n'etya, n'esirika,

⁹ Katonda bwe yagolokoka okusala omusango, Okulokola abawombeefu bonna abali mu nsi. (Seera)

¹⁰ Mazima obusungu bw'abantu bulikutendereza: Obusungu obulisigalawo olibwesiba.

¹¹ Mweyame obweyamo, musasule Mukama Katonda wammwe: Bonna abamwetoolodde baleetere ebirabo oyo agwanira okutiibwa.

¹² Alizikiriza omwoyo gw'abalangira: Ye w'entiisa eri bakabaka b'ensi.