Read luganda Zabbuli 88 Bible Online

Zabbuli 88 - luganda bible

Zabbuli 88

¹Oluyimba, zabbuli ya batabani ba Koola; ya mukulu w'abayimbi; ey'ekimakalasu-Leyanosi. Masukiri ya Kemani Omuzera. Ai Mukama, Katonda ow'obulokozi bwange, Naakaabiranga emisana n'ekiro mu maaso go:

²Okusaba kwange kuyingire w'oli; Otege okutu kwo eri okukaaba kwange:

³ Kubanga emmeeme yange ejjudde ennaku, N'obulamu bwange busemberera emagombe.

⁴ Bambalira wamu n'abo abakka mu bunnya; Nninga omuntu atalina mubeezi:

⁵ Asuulibwa mu bafu, Ali ng'abattibwa abagalamira mu ntaana, B'otojjukira nate; Era bayawukana n'omukono gwo.

⁶ Ontadde mu bunnya obuli wansi ennyo, Mu bifo eby'enzikiza, mu buziba.

⁷Obusungu bwo bunyigiriza nnyo, Era ombonyabonyezza n'amayengo go gonna. (Seera)

⁸ Onjawukanyirizza wala n'abo be mmanyi; Onfudde ekitama eri abo: Nsibiddwa, so siyinza kuvaamu.

⁹ Eriiso lyange likulukuse olw'okunakuwala: Nkukaabira buli lunaku, ai Mukama, Ntega engalo zange eri ggwe.

¹⁰ Oliraga abafu eby'amagero? Abaafa baligolokoka balikutendereza?

¹¹Ekisa kyo kiribuulirirwa mu magombe? N'obwesigwa bwo mu kuzikirira?

¹² Eby'amagero byo birimanyirwa mu kizikiza? N'obutuukirivu bwo mu nsi ey'okwerabira?

¹³ Naye ggwe, ai Mukama, gwe nkaabira, Era buli nkya okusaba kwange kunaatuukanga mu maaso go.

¹⁴ Mukama, kiki ekikusuuza emmeeme yange? Kiki ekikunkwesa amaaso go?

¹⁵ Mbonyaabonyezebwa, nfaanana okufa okuva mu buto bwange: Entiisa zo bwe zimbaako, ne nneeraliikirira nnyo.

¹⁶Obusungu bwo obukambwe buntuuseeko; Entiisa zo zinzingizizza.

¹⁷ Banneetooloola ng'amazzi okuzibya obudde; Bantaayiza eruuyi n'eruuyi wamu.

¹⁸ Abanjagala ne mikwano gyange obaawukanyizza wala nange, N'abo be mmanyi mu kizikiza.