Read luganda Zabbuli 9 Bible Online

Zabbuli 9 - luganda bible

Zabbuli 9

¹Ya mukulu w'abayimbi; ey'e Kimusulabbeni. Zabbuli ya Dawudi. Neebazanga Mukama n'omutima gwange gwonna; Naayolesanga ebikolwa byo eby'ekitalo byonna.

² Naasanyukanga naajagulizanga mu ggwe: Naayimbanga okutendereza erinnya lyo, ggwe ali waggulu ennyo.

³Abalabe bange bwe badda ennyuma, Beesittala ne bazikirira mu maaso go.

⁴ Kubanga ggwe wayamba ensonga yange n'ebigambo byange; Watuula ku ntebe, ng'osala omusango ogw'ensonga.

⁵ Waboggolera amawanga, wazikiriza ababi, Wasangula erinnya lyabwe emirembe n'emirembe.

⁶Abalabe baweddewo, baviibwamu emirembe egitaggwaawo; N'ebibuga bye wamenya. Era n'ekijjukizo kyabyo kizikiridde.

⁷ Naye Mukama atuula kabaka emirembe egitaggwaawo: Ateeseteese entebe ye okusala omusango.

⁸ Naye alisala omusango ogw'ensi zonna mu butuukirivu, Aliwa omusango amawanga mu mazima.

⁹ Era Mukama anaabeeranga kigo ekiwanvu eri abayigganyizibwa, Ekigo ekiwanvu mu biro eby'ennaku;

¹⁰ N'abo abamanyi erinnya lyo baneesiganga ggwe; Kubanga ggwe, Mukama, tonnabaleka abakunoonya.

¹¹ Muyimbe okutendereza Mukama, atuula mu Sayuuni: Mubuulire ebikolwa bye mu bantu.

¹² Kubanga oyo avunaana omusaayi abajjukira: Teyeerabira kukaaba kw'abaavu.

¹³Onsaasire, ai Mukama; Laba okubonaabona kwange kwe bankola abankyaye, Ggwe annyimusa ku miryango egy'olumbe;

¹⁴ Ndyoke njolesenga ettendo lyo lyonna: Mu miryango egy'omuwala wa Sayuuni Naasanyukiranga obulokozi bwo.

¹⁵ Amawanga gagudde mu bunnya bwe baasima: Mu kyambika kye baatega ekigere kyabwe mwe kikwatiddwa.

¹⁶ Mukama yeetegeezezza, atuukirizza omusango: Omubi akwatibwa mu mirimu gy'emikono gye. (Kiggayoni.) Seera

¹⁷ Ababi balidda mu magombe. Ge mawanga gonna ageerabira Katonda.

¹⁸ Kubanga abaavu tebeerabirwenga ennaku zonna, So essuubi ery'abawombeefu teriibulenga emirembe gyonna.

¹⁹ Golokoka, ai Mukama; abantu balemenga okuwangula: Amawanga gasalirwe omusango mu maaso go.

²⁰Obatiise, ai Mukama: Amawanga geetegeere nga bantu buntu. (Seera)