Read luganda Zabbuli 90 Bible Online

Zabbuli 90 - luganda bible

Zabbuli 90

¹Okusaba kwa Musa omusajja wa Katonda. Mukama, ggwe wali kifo kyaffe eky'okutuulamu Mu mirembe gyonna.

² Ensozi nga tezinnazaalibwa, Era nga tonnabumba nsi n'ebintu, Okuva mu mirembe gyonna okutuusa mu mirembe gyonna, ggwe Katonda.

³ Osindika abantu mu kuzikirira; Era oyogera nti Muddeeyo, mmwe abaana b'abantu.

⁴ Kubanga emyaka olukumi mu maaso go Giri ng'olwajjo olwayita, Era ng'ekisisimuka ky'ekiro.

⁵ Obatwalira ddala nga mukoka; bali ng'otulo: Enkya bali ng'omuddo ogumera.

⁶ Enkya guloka, gumera; Akawungeezi nga gusaliddwa, era nga guwotose.

⁷Kubanga obusungu bwo butumalawo, Era bw'onyiiga ne tweraliikirira.

⁸ Otadde obutali butuukirivu bwaffe mu musana gw'amaaso go, Ebibi byaffe eby'ekyama mu musana gw'amaaso go.

⁹Kubanga ennaku zaffe zonna ziyita mu busungu bwo; Emyaka gyaffe giggwaawo ng'ekirowoozo.

¹⁰Ennaku z'emyaka gyaffe gye myaka nsanvu, Era naye amaanyi gaweza emyaka ekinaana; Naye amalala gaabwe kwe kutegana n'okunakuwala kwereere; Kubanga gayita mangu, naffe ne tubula.

¹¹Ani amanyi obuyinza obw'obusungu bwo, N'okunyiiga nga bw'ogwanira okutiibwa?

¹² Otuyigirize tubalenga bwe tutyo ennaku zaffe, Tulyoke tufune omutima omugezigezi.

¹³ Okomewo, ai Mukama; olituusa wa? Era wejjuse mu bigambo eby'abaddu bo.

¹⁴ Otukkuse enkya n'okusaasira kwo; Tusanyukenga, tujaguzenga, ennaku zaffe zonna.

¹⁵Otusanyuse ng'ennaku bwe ziri ze watubonyaabonyezangamu, Era ng'emyaka bwe giri gye twalabirangamu obubi.

¹⁶ Omulimu gwo gulabikirenga abaddu bo, N'ekitiibwa kyo kirabikenga ku baana baabwe.

¹⁷ Era n'obulungi bwa Mukama Katonda waffe bubeerenga ku ffe: Era otunywerezenga emirimu gy'emikono gyaffe: Weewaawo, emirimu gy'emikono gyaffe oginywezenga.