Read luganda Zabbuli 98 Bible Online

Zabbuli 98 - luganda bible

Zabbuli 98

¹Zabbuli. Mumuyimbire Mukama oluyimba oluggya; Kubanga akoze eby'amagero: Engalo ze eza ddyo, n'omukono gwe omutukuvu bimuleetedde obulokozi.

² Mukama amanyisizza obulokozi bwe: Obutuukirivu bwe abwolekerezza ddala mu maaso g'amawanga.

³ Ajjukidde okusaasira kwe n'obwesigwa bwe eri ennyumba ya Isiraeri: Enkomerero zonna ez'ensi zirabye obulokozi bwa Katonda waffe.

⁴ Muyimbe n'eddoboozi ery'essanyu eri Mukama, mmwe ensi zonna: Muleete oluyimba muyimbe olw'essanyu, weewaawo, muyimbe eby'okutendereza.

⁵Muyimbe okutendereza Mukama n'ennanga; N'ennanga era n'eddoboozi eriyimba.

⁶ N'amakondeere n'eddoboozi ery'akagombe Muleete eddoboozi ery'essanyu mu maaso ga Kabaka, Mukama.

⁷ Ennyanja ewuume, n'okujjula kwayo; Ensi zonna, n'abo abazituulamu;

⁸ Amazzi gakube mu ngalo; Ensozi ziyimbire wamu olw'essanyu;

⁹Mu maaso ga Mukama, kubanga ajja okusalira ensi omusango: Alisalira ensi emisango egy'ensonga, Aliramula amawanga n'obutuukirivu.