Read luganda Zabbuli 99 Bible Online

Zabbuli 99 - luganda bible

Zabbuli 99

¹ Mukama afuga; amawanga gakankane; Atuula wakati wa bakerubi; ensi esagaasagane.

² Mukama mukulu mu Sayuuni; Era ali waggulu okusinga amawanga gonna.

³ Batendereze erinnya lyo ekkulu era ery'entiisa. Ye mutukuvu.

⁴ Era amaanyi ga kabaka gaagala omusango ogw'ensonga; Ggwe onyweza obutuukirivu, Otuukiriza omusango n'obutuukirivu mu Yakobo.

⁵ Mumugulumizenga Mukama Katonda waffe, Era musinzizenga ku ntebe y'ebigere bye: Ye mutukuvu.

⁶ Musa ne Alooni mu bakabona be, Ne Samwiri mu abo abakoowoola erinnya lye; Baakaabira Mukama, n'abayitaba.

⁷ Yayogerera nabo mu mpagi ey'ekire: Baakwata bye yategeeza, n'ekiragiro kye yabawa.

⁸ Wabaddamu, ai Mukama Katonda waffe: Wali Katonda abasonyiwa, Newakubadde nga wabawalana eggwanga olw'ebikolwa byabwe.

⁹ Mumugulumizenga Mukama Katonda waffe, Musinzizenga ku lusozi lwe olutukuvu; Kubanga Mukama Katonda waffe mutukuvu.