Read luganda Engero 1 Bible Online

Engero 1 - luganda bible

Engero 1

¹ Engero za Sulemaani mutabani wa Dawudi, kabaka wa Isiraeri:

²Okumanyanga amagezi n'okuyigirizibwanga; Okwawulanga ebigambo eby'okutegeera;

³ Okukkiriza okuyigirizibwanga okukolanga eby'amagezi, Obutuukirivu n'okusalanga emisango n'okugobereranga ensonga;

⁴Okuwanga abatalina magezi obukabakaba, Omulenzi abeerenga n'okumanya n'okuteesa:

⁵Ow'amagezi awulire yeeyongerenga okuba n'okuyiga; Era omusajja alina okutegeera afune okuteesanga okutuufu:

⁶ Okutegeeranga olugero n'ekifaananyi; Ebigambo eby'abagezigezi n'ebikokko byabwe.

⁷ Mu kutya Mukama okumanya mwe kusookera: Naye abasirusiru banyooma amagezi n'okuyigirizibwanga.

⁸Mwana wange, wulira okuyigirizanga kwa kitaawo, So tova mu tteeka lya nnyoko:

⁹ Kubanga binaabanga ngule ya kisa ku mutwe gwo, N'emikuufu egyetoolodde obulago bwo.

¹⁰Mwana wange, abalina ebibi bwe bakusendasenda, Tokkirizanga.

¹¹Bwe boogera nti Jjangu tugende fenna, Tuteege omusaayi, Tugwire mu kyama ataliiko musango awatali nsonga;

¹² Tubamire nga bakyali balamu ng'amagombe, Era nga bakyali balamba ng'abo abakka mu bunnya;

¹³Tuliraba ebintu byonna eby'omuwendo omungi, Tulijjuza ennyumba zaffe omunyago;

¹⁴Oneekubira akalulu wamu naffe; Fenna tunaabanga n'ensawo emu:

¹⁵ Mwana wange, totambuliranga mu kkubo wamu nabo: Ziyizanga ekigere kyo okuyitanga mu lugendo lwabwe:

¹⁶ Kubanga ebigere byabwe bidduka mbiro okugoberera obubi, Era byanguwa okuyiwa omusaayi.

¹⁷Kubanga bategera bwereere ekitimba, Ennyonyi yonna ng'ekiraba:

¹⁸Era abo bateega omusaayi gwabwe bo, Bagwira mu kyama obulamu bwabwe bo.

¹⁹Bwe gatyo bwe gabeera amakubo aga buli muntu eyeegomba amagoba; Gaggyawo obulamu bwa bannyini go.

²⁰ Amagezi googerera waggulu mu luguudo; Galeeta eddoboozi lyago mu bifo ebigazi;

²¹Googerera waggulu mu kifo ekikulu eky'okukuŋŋaaniramu; Awayingirirwa mu miryango, Mu kibuga mwe galeetera ebigambo byago:

²²Mmwe abatalina magezi, mulituusa wa okwagalanga obutaba na magezi? N'abanyooma okusanyukiranga okunyooma, N'abasirusiru okukyawanga okumanya?

²³ Mukyuke olw'okunenya kwange: Laba, naafukanga omwoyo gwange gye muli, Naabamanyisanga ebigambo byange.

²⁴ Kubanga mpise, mmwe ne mugaana; Ngolodde omukono gwange, so tewali muntu assizzaayo mwoyo;

²⁵ Naye mujjuludde okuteesa kwange kwonna, So temwagadde kunenya kwange n'akatono:

²⁶ Era nange ndisekera ku lunaku kwe mulirabira ennaku; Ndikudaala entiisa yammwe bw'erituuka;

²⁷Entiisa yammwe bw'erituuka ng'omuyaga, N'ennaku ze muliraba bwe zirijja ng'embuyaga ez'akazimu; Okweraliikirira n'obubalagaze bwe biribajjira.

²⁸ Kale bwe balinkaabira, naye siriddamu; Balinnoonya nnyo, naye tebalindaba:

²⁹ Kubanga baakyawanga okumanya, So tebeerobozanga kutya Mukama:

³⁰ Tebaayagalanga kuteesa kwange n'akatono; Baanyoomanga okunenya kwange kwonna:

³¹ Kyebaliva balya ku bibala eby'ekkubo lyabwe bo, Ne bakkuta enkwe zaabwe bo.

³² Kubanga okudda ennyuma okw'abatalina magezi kulibatta, N'okulaba omukisa okw'abasirusiru kulibazikiriza.

³³ Naye buli anaawuliranga nze anaabeeranga mirembe, Era anaatereeranga nga tewali kutya kabi.