Read luganda Engero 10 Bible Online

Engero 10 - luganda bible

Engero 10

¹ Engero za Sulemaani. Omwana ow'amagezi asanyusa kitaawe: Naye omwana omusirusiru anakuwaza nnyina.

² Obugagga obw'obubi tebuliiko kye bugasa: Naye obutuukirivu buwonya mu kufa.

³ Mukama taalekenga mmeeme ya mutuukirivu okufa enjala: Naye okwegomba kw'ababi akusindika eri.

⁴ Ayavuwala oyo akola n'omukono oguddiridde: Naye omukono gw'abanyiikivu guleeta obugagga.

⁵ Akungulira mu kyeya mwana wa magezi: Naye oyo eyeebakira mu biro eby'okukunguliramu ye mwana akwasa ensonyi.

⁶Emikisa giba ku mutwe gw'omutuukirivu: Naye ekyejo kibikka ku kamwa k'ababi.

⁷ Ekijjukizo ky'omutuukirivu kirina omukisa: Naye erinnya ly'ababi lirivunda.

⁸ Alina omutima ogw'amagezi anakkirizanga ebiragiro: Naye omubuyabuya aligwa.

⁹ Atambulira mu bugolokofu ye atambula emirembe: Naye akyamya amakubo ge alimanyibwa.

¹⁰ Atemya eriiso eleeta ennaku: Naye omusirusiru omubuyabuya aligwa.

¹¹ Akamwa k'omutuukirivu nsulo ya bulamu: Naye ekyejo kibikka ku kamwa k'ababi.

¹² Okukyawa kuleeta ennyombo: Naye okwagala kubikka ku byonoono byonna.

¹³ Mu mimwa gy'oyo alina okwawula mulabikamu amagezi: Naye omuggo gwa mabega g'oyo abulwa okutegeera.

¹⁴Ab'amagezi batereka okumanya: Naye akamwa k'omusirusiru kwe kuzikirira okutavaawo.

¹⁵ Ebintu eby'omugagga kye kibuga kye eky'amaanyi: Abaavu okuzikirira kwabwe bwavu bwabwe.

¹⁶ Omulimu ogw'omutuukirivu guleeta bulamu; Ekyengera eky'omubi kireeta kwonoona.

¹⁷ Oyo ali mu kkubo ery'obulamu assaayo omwoyo eri okubuulirirwa: Naye oyo aleka okunenyezebwa akyama.

¹⁸Oyo akisa okukyawa wa mimwa gya bulimba; N'oyo awaayiriza musirusiru.

¹⁹ Mu lufulube lw'ebigambo temubula kusobya: Naye oyo aziyiza emimwa gye akola eby'amagezi.

²⁰Olulimi lw'omutuukirivu ffeeza nnonde: Omutima gw'ababi tegugasa nnyo.

²¹Emimwa gy'omutuukirivu giriisa bangi: Naye abasirusiru bafa olw'okubulwa okutegeera.

²² Omukisa gwa Mukama gwe gugaggawaza, So tagatta buyinike bwonna wamu nagwo.

²³Okukola obubi muzannyo gwa musirusiru: Era bwe gatyo amagezi bwe gabeera eri omuntu alina okutegeera.

²⁴ Omubi ky'atya kirimujjira: N'ekyo abatuukirivu kye beegomba balikiweebwa.

²⁵ Empewo ez'akazimu bwe ziyita, kale omubi nga takyaliwo: Naye omutuukirivu musingi gwa lubeerera.

²⁶Ng'omwenge omukaatuufu bwe gugira amannyo, era ng'omukka bwe gugira amaaso, N'omugayaavu bw'agira bw'atyo abo abamutuma.

²⁷ Okutya Mukama kuwangaaza: Naye emyaka gy'ababi girisalibwako.

²⁸ Essuubi ery'abatuukirivu liriba ssanyu: Naye okusuubira kw'ababi kulizikirira.

²⁹ Ekkubo lya Mukama kigo eri omugolokofu; Naye kuzikirira eri abo abakola ebitali bya butuukirivu.

³⁰ Omutuukirivu tajjululwenga ennaku zonna: Naye ababi tebalibeera mu nsi.

³¹Akamwa k'omutuukirivu kazaala amagezi: Naye olulimi olubambaavu lulimalibwawo.

³² Emimwa gy'omutuukirivu gimanyi ebikkirizibwa: Naye omumwa gw'ababi gwogera bubambaavu.