Read luganda Engero 13 Bible Online

Engero 13 - luganda bible

Engero 13

¹ Omwana ow'amagezi awulira okuyigiriza kwa kitaawe: Naye omunyoomi tawulira kunenyezebwa.

² Omuntu anaalyanga ebirungi olw'ebibala eby'akamwa ke: Naye emmeeme ey'abasala enkwe eneeryanga kugirirwa kyejo.

³ Akuuma akamwa ke anyweza obulamu bwe: Naye ayasama ennyo akamwa ke aliba n'okuzikirira.

⁴ Emmeeme ey'omugayaavu yeegomba n'eteba na kintu: Naye emmeeme ey'abanyiikivu eneegejjanga.

⁵Omuntu omutuukirivu akyawa obulimba: Naye omuntu omubi mugwagwa, era akwatibwa ensonyi.

⁶ Obutuukirivu bukuuma oyo akwata ekkubo eggolokofu: Naye ekyejo kisuula oyo alina ebibi.

⁷ Wabaawo eyeegaggawaza, naye nga talina kintu: Wabaawo eyeeyavuwaza, naye ng'alina obugagga bungi.

⁸Obugagga bwe bununula obulamu bw'omuntu: Naye omwavu, tawulira kukanga kwonna.

⁹ Omusana ogw'abatuukirivu gusanyuka: Naye ettabaaza ey'ababi erizikizibwa.

¹⁰Amalala galeeta okuwakana okwereere: Naye amagezi gaba n'abo abateesa obulungi.

¹¹ Obugagga obufunibwa olw'ebigambo ebitaliimu bulikendeezebwa: Naye oyo akuŋŋaanya ng'akola emirimu aliba n'okwala.

¹² Essuubi erirwawo lisinduukiriza emmeeme: Naye ekyegombebwa bwe kijja kiba muti gwa bulamu.

¹³ Buli anyooma ekigambo yeereetako okuzikirira: Naye oyo atya ekiragiro aliweebwa empeera.

¹⁴ Etteeka ery'omugezigezi nsulo ya bulamu, Okuva mu byambika eby'okufa.

¹⁵Okutegeera okulungi kuleeta okuganja: Naye ekkubo ery'abasala enkwe bbi.

¹⁶ Buli muntu omutegeevu akola emirimu n'okumanya: Naye omusirusiru ayaliira obusirusiru.

¹⁷ Omubaka ow'ekyejo agwa mu bubi: Naye omutume omwesigwa kwe kulaama.

¹⁸ Obwavu n'ensonyi biriba by'oyo agaana okubuulirirwa: Naye assaayo omwoyo eri okuneenyezebwa alissibwamu ekitiibwa.

¹⁹Ekyegombebwa bwe kituukirira kiwoomera emmeeme: Naye okuva mu bubi kwa muzizo eri abasirusiru.

²⁰Otambulanga n'abantu ab'amagezi, naawe oliba n'amagezi: Naye munnaabwe w'abasirusiru alibalagalwa.

²¹ Obubi bugoberera abalina ebibi: Naye abatuukirivu balisasulibwa ebirungi.

²² Omuntu omulungi alekera obusika abaana b'abaana be: N'obugagga bw'oyo alina ebibi buterekerwa omutuukirivu.

²³Mu nnimiro ez'abaavu mulimu emmere nnyingi: Naye wabaawo azikirizibwa olw'obutagoberera nsonga.

²⁴ Atakwata muggo gwe akyawa omwana we: Naye oyo amwagala amukangavvula ebiro nga bikyali.

²⁵Omutuukirivu alya, emmeeme ye n'ekkuta: Naye olubuto lw'ababi lulirumwa enjala.