Read luganda Engero 14 Bible Online

Engero 14 - luganda bible

Engero 14

¹ Buli mukazi ow'amagezi azimba ennyumba ye. Naye omusirusiru agyabya n'emikono gye ye.

² Atambulira mu bugolokofu bwe atya Mukama: Naye akyamakyama mu makubo ge amunyooma.

³ Mu kamwa k'omusirusiru mulimu omuggo ogw'amalala: Naye emimwa gy'ab'amagezi ginaabakuumanga.

⁴Eteri nte ekisibo kiba kirongoofu: Naye amaanyi g'ente galeeta okwala kungi.

⁵ Omujulirwa omwesigwa talimba: Naye omujulirwa ow'obulimba ayogera eby'okuwaayiriza.

⁶ Anyooma anoonya amagezi n'atagalaba: Naye okumanya kwangu eri oyo alina okutegeera.

⁷Yingira mu maaso g'omusirusiru, Toolabe ku ye mimwa gya kumanya.

⁸Okutegeera ekkubo lye ge magezi g'omutegeevu: Naye abasirusiru obusirusiru bwabwe kulimba.

⁹ Abasirusiru bakudaalira omusango: Naye mu bagolokofu mulimu ekisa.

¹⁰Omutima gumanya okulumwa kwagwo; So n'omugenyi teyeetabula mu ssanyu lyagwo.

¹¹ Ennyumba ey'ababi erisuulibwa: Naye eweema ey'abagolokofu eneebanga n'omukisa.

¹² Waliwo ekkubo omuntu ly'ayita eddungi, Naye enkomerero yaalyo ge makubo ag'okufa.

¹³ Ne bwe guseka omutima gunakuwala; N'enkomerero y'okuseka buyinike.

¹⁴ Adda ennyuma mu mutima gwe alikkuta amakubo ge ye: N'omuntu omulungi alikkuta ye yennyini.

¹⁵Atalina magezi akkiriza buli kigambo kyonna: Naye omuntu omutegeevu akebera nnyo amagenda ge.

¹⁶ Omuntu ow'amagezi atya n'ava mu bubi: Naye omusirusiru aba n'ettitimbuli, era yeeyinula.

¹⁷Ayanguwa okusunguwala alikola eby'obusirusiru: N'omuntu asala enkwe embi akyayibwa.

¹⁸Abatalina magezi basikira obusirusiru: Naye abategeevu bassibwako engule kwe kumanya.

¹⁹ Ababi bakutamira abalungi; N'ab'ekyejo awali emiryango egy'abatuukirivu.

²⁰ Omwavu ne munne amukyawa: Naye omugagga alina emikwano mingi.

²¹ Anyooma munne ayonoona: Naye asaasira abaavu alina omukisa.

²²Abagunja obubi tebawaba? Naye okusaasirwa n'amazima binaabanga byabwe abagunja obulungi.

²³Omulimu gwonna guliko kye gugasa: Naye okubuyabuya kw'emimwa kwavuwaza bwavuwaza.

²⁴Obugagga bwabwe ye ngule ey'ab'amagezi: Naye obusirusiru bw'abasirusiru busirusiru bwereere.

²⁵ Omujulirwa ow'amazima awonya emmeeme z'abantu: Naye aleeta eby'obulimba akyamya.

²⁶ Mu kutya Mukama mulimu okuguma ennyo omwoyo: N'abaana be baliba n'obuddukiro.

²⁷ Okutya Mukama nsulo ya bulamu, Okuva mu byambika eby'okufa.

²⁸ Mu lufulube lw'abantu mwe muli ekitiibwa kya kabaka: Naye okubulwa abantu kwe kuzikirira kw'omulangira.

²⁹ Alwawo okusunguwala alina okutegeera kungi: Naye alina omwoyo ogwanguyiriza agulumiza abusirusiru.

³⁰ Omutima omutuufu bwe bulamu obw'omubiri: Naye obuggya kwe kuvunda kw'amagumba.

³¹ Ajooga omwavu avuma Omutonzi we: Naye asaasira oyo eyeetaaga amussaamu ekitiibwa.

³² Omubi asindikibwa wansi mu kwonoona kwe: Naye omutuukirivu alina essuubi mu kufa kwe:

³³Amagezi gabeera mu mutima gw'oyo alina okutegeera: Naye ekiri ku kitundu eky'abasirusiru eky'omunda kimanyisibwa.

³⁴Obutuukirivu bugulumiza eggwanga: Naye ekibi kivumisa eggwanga lyonna.

³⁵ Omuddu akola eby'amagezi ye aganja eri kabaka: Naye obusungu bwe bunaabanga eri oyo akwasa ensonyi.