Read luganda Engero 2 Bible Online

Engero 2 - luganda bible

Engero 2

¹Mwana wange, bw'onokkirizanga ebigambo byange, N'oterekanga ebiragiro byange ewuwo;

²N'okutega n'oteganga okutu kwo eri amagezi N'ossangayo omutima gwo eri okutegeera;

³Weewaawo, bw'onookaabiranga okumanya, N'oliriranga okutegeera.

⁴Bw'onooganoonyanga nga ffeeza, N'ogakenneenyanga ng'eby'obugagga ebyakwekebwa;

⁵Kale lw'olitegeera okutya Mukama, N'ovumbula okumanya Katonda.

⁶ Kubanga Mukama awa amagezi; Mu kamwa ke mwe mufuluma okumanya n'okutegeera:

⁷ Aterekera abagolokofu amagezi amatuufu, Aba ngabo eri abo abatambulira mu butayonoona;

⁸ Alyoke akuume amakubo ag'omusango, Era awonye okutambula kw'abatukuvu be.

⁹Kale lw'olitegeera obutuukirivu n'omusango, N'eby'ensonga, weewaawo buli kkubo eddungi.

¹⁰Kubanga amagezi ganaayingiranga mu mutima gwo, N'okumanya kunaawoomeranga emmeeme yo;

¹¹ Okuteesa kunaakulabiriranga. Okutegeera kunaakukuumanga:

¹²Okukuwonyanga mu kkubo ery'obubi, Eri abasajja aboogera eby'ekyejo;

¹³ Abaleka amakubo ag'obugolokofu, Okutambuliranga mu makubo ag'ekizikiza;

¹⁴ Abasanyuka okukola obubi, N'ekyejo eky'omubi kye kibawoomera;

¹⁵ Amakubo gaabwe makyamukyamu, N'okugenda kwabwe kwenyoolanyoola:

¹⁶ Okukuwonyanga eri omukazi omugenyi, Eri omugenyi anyumiriza n'ebigambo bye;

¹⁷ Aleka omukwano ogw'omu buto bwe, Ne yeerabira endagaano ya Katonda we:

¹⁸ Kubanga ennyumba ye etwala mu kufa, N'amakubo ge eri abafu:

¹⁹Tewali abagenda gy'ali abadda nate, So tebatuuka mu makubo ag'obulamu:

²⁰Olyoke otambulirenga mu kkubo ery'abasajja abalungi, N'okwata empenda ez'abatuukirivu.

²¹ Kubanga abagolokofu banaabeeranga mu nsi, N'abo abatuukirira balisigala omwo.

²² Naye ababi balimalibwawo okuva mu nsi, N'abo abasala enkwe balisimbulirwamu ddala.