Read luganda Engero 20 Bible Online

Engero 20 - luganda bible

Engero 20

¹ Omwenge mukudaazi, ekitamiiza muleekaanyi; Era buli akyama olw'ebyo talina magezi.

² Entiisa ya kabaka kuwuluguma kwa mpologoma: Amusunguwaza ayonoona obulamu bwe ye.

³ Omuntu eyeewala ennyombo yeefunira ekitiibwa: Naye buli musirusiru ayagala okuyombanga.

⁴ Omugayaavu taganya kulima olwa ttoggo; Kyanaavanga asabiriza okukungula nga kutuuse n'ataba na kintu.

⁵ Okuteesa okw'omu mutima gw'omuntu kuli ng'amazzi ag'omu luzzi oluwanvu; Naye omuntu alina okutegeera alikusena.

⁶ Abantu bangi abalirangira buli muntu ekisa kye ye: Naye omuntu omwesigwa ani ayinza okumulaba?

⁷ Omuntu omutuukirivu atambulira mu butayonoona bwe, Abaana be abaddawo balina omukisa.

⁸ Kabaka atudde ku ntebe esalirwako emisango Asaasaanya obubi bwonna n'amaaso ge.

⁹ Ani ayinza okwogera nti Nnongoosezza omutima gwange, Ndi mulongoofu mu kwonoona kwange?

¹⁰ Ebipima ebitenkana n'ebigera ebitenkana Byombi bya muzizo eri Mukama.

¹¹ Era n'omwana omuto yeemanyisa olw'ebikolwa bye, Omulimu gwe oba nga mulongoofu, oba nga mulungi.

¹² Okutu okuwulira, n'eriiso eriraba, Mukama ye yakola byombi.

¹³ Toyagalanga kwebaka oleme okutuuka mu bwavu; Zibulanga amaaso go, onokkutanga emmere.

¹⁴Tekiriiko kye kigasa, tekiriiko kye kigasa, bw'ayogera agula: Naye ng'amaze okugenda n'alyoka yeenyumiriza.

¹⁵ Waliwo zaabu n'amayinja amatwakaavu mangi nnyo: Naye emimwa egy'okumanya kya buyonjo kya muwendo mungi.

¹⁶ Twalanga ekyambalo ky'oyo eyeeyimirira gw'atamanyi; Era obowenga oyo eyeeyimirira b'atamanyi.

¹⁷ Emmere ey'obulimba ewoomera omuntu; Naye oluvannyuma akamwa ke kalijjula omusenyu.

¹⁸ Buli kigambo ky'omalirira kinywezebwa na kuteesa: Era tabaalanga n'okukulemberwa okw'amagezi.

¹⁹ Atambulatambula ng'alyolyoma abikkula ebyama: Kale teweetabulanga n'oyo ayasama ennyo emimwa gye.

²⁰ Akolimira kitaawe oba nnyina, Ettabaaza ye erizikizibwa mu kizikiza ekikutte zigizigi.

²¹ Obusika buyinzika okufunibwa amangu olubereberye; Naye enkomerero yaabwo teriba na mukisa.

²² Toyogeranga nti Ndisasula obubi: Lindiriranga Mukama naye anaakuwonyanga.

²³ Ebipima ebitenkana bya muzizo eri Mukama; Ne minzaani ey'obulimba si nnungi.

²⁴ Amagenda g'omuntu gava eri Mukama; Kale nno omuntu ayinza atya okutegeera ekkubo lye?

²⁵ Kyambika eri omuntu, okwogera ng'ayanguyiriza nti Kitukuvu, Awo ng'amaze okweyama n'alyoka abuuza.

²⁶Kabaka ow'amagezi awewa ababi, Era abaleetako nnamuziga ewuula.

²⁷ Omwoyo gw'omuntu ye ttabaaza ya Mukama, Ekebera ebitundu byonna eby'olubuto eby'omunda.

²⁸ Okusaasira n'amazima biwonya kabaka: Era okusaasira kwe kuwanirira entebe ye.

²⁹ Abalenzi ekitiibwa kyabwe maanyi gaabwe: N'abakadde omutwe oguliko envi bwe bulungi bwabwe.

³⁰Emiggo egiruma gimalawo obubi: N'enga zituuka mu bitundu eby'olubuto eby'omunda.