Read luganda Engero 21 Bible Online

Engero 21 - luganda bible

Engero 21

¹ Omutima gwa kabaka guli mu mukono gwa Mukama ng'emigga: Agukyusa gy'ayagala yonna.

² Buli kkubo ery'omuntu ddungi mu maaso ge ye: Naye Mukama ye apima emitima.

³ Okukola eby'ensonga n'eby'omusango Kukkirizibwa Mukama okusinga ssaddaaka.

⁴ Amaaso ageegulumiza n'omutima ogw'amalala, Ye ttabaaza ey'ababi, kwe kwonoona.

⁵ Ebirowoozo eby'omunyiikivu bireeta bungi bwereere Naye buli muntu ayanguyiriza ayanguya okwetaaga obwetaazi.

⁶Okufuna obugagga n'olulimi olulimba Mukka ogutwalibwa eruuyi n'eruuyi; ababunoonya banoonya okufa.

⁷Ekyejo eky'ababi kiribamalawo; Kubanga bagaana okukola eby'ensonga.

⁸ Ekkubo ly'oyo eyeebinise omusango likyamakyama nnyo nnyini: Naye omulongoofu omulimu gwe mulungi.

⁹ Beeranga ku nnyumba waggulu awafunda Olemenga okubeera n'omukazi omuyombi mu nnyumba engazi.

¹⁰Emmeeme y'omubi yeegomba obubi: Munne taganja n'akamu mu maaso ge.

¹¹ Omunyoomi bw'abonerezebwa: atalina magezi agafuna: Era ow'amagezi bw'ayigirizibwa aweebwa okumanya.

¹² Omuntu omutuukirivu alowooza ennyumba ey'omubi; Ababi bwe basuulibwa ne babula.

¹³ Aziba amatu ge omwavu bw'akaaba, Era naye alikaaba, naye taliwulirwa.

¹⁴Ekirabo eky'omu kyama kikkakkanya obusungu, N'ekitone eky'omu kifuba kikkakkanya ekiruyi ekingi.

¹⁵ Okukolanga eby'ensonga ssanyu lya mutuukirivu. Naye kuzikirira eri abakola ebitali bya butuukirivu.

¹⁶Omuntu awaba okuva mu kkubo ery'okutegeera Aliwummulira mu kkuŋŋaaniro ery'abafu.

¹⁷Ayagala essanyu anaabanga mwavu: Ayagala omwenge n'amafuta taabenga mugagga.

¹⁸ Omubi aba kinunulo kya mutuukirivu; N'oyo asala enkwe adda mu kifo ky'abagolokofu.

¹⁹Beeranga mu nsi ey'eddungu Olemenga okubeera n'omukazi omuyombi anyiiganyiiga.

²⁰ Mu nnyumba ey'omutuukirivu mulimu obugagga obw'omuwendo omungi n'amafuta; Naye omusirusiru abumira.

²¹ Agoberera obutuukirivu n'okusaasira Alaba obulamu n'obutuukirivu n'ekitiibwa.

²² Omuntu ow'amagezi alinnya mu kibuga eky'ab'amaanyi, N'akkakkanya amaanyi ag'obugumu bwakyo.

²³ Buli akuuma akamwa ke n'olulimi lwe Akuuma emmeeme ye obutalaba nnaku.

²⁴Omuntu ow'amalala eyeegulumiza, erinnya lye munyoomi, Akolera emirimu mu ttitimbuli ery'amalala.

²⁵ Okwegomba okw'omugayaavu kumutta; Kubanga emikono gye gigaana okukola emirimu.

²⁶ Wabaawo ayaayaana ennyo okuzibya obudde: Naye omutuukirivu awa n'atamma

²⁷ Ssaddaaka ey'ababi ya muzizo: Bw'agireeta n'emmeeme embi, tesinga nnyo kuba ya muzizo?

²⁸ Omujulirwa ow'obulimba anaabulanga: Naye omuntu awulira anaayogeranga nga tewali amulimbulula.

²⁹Omuntu omubi akakanyaza amaaso ge: Naye omugolokofu aliraanya amakubo ge.

³⁰ Tewali magezi newakubadde okutegeera Newakubadde okuteesa ku Mukama.

³¹ Embalaasi etegekerwa olunaku olw'olutalo. Naye okuwangula kuva eri Mukama.