Read luganda Engero 22 Bible Online

Engero 22 - luganda bible

Engero 22

¹ Erinnya eddungi lya kulondebwa okusinga obugagga obungi, N'okuganja n'okwagalwa okusinga ffeeza ne zaabu.

² Omugagga n'omwavu baalabagana: Mukama ye yabatonda bonna.

³ Omuntu omutegeevu alaba akabi ne yeekweka: Naye abatalina magezi bayita buyisi ne bafiirwa.

⁴ Obugagga n'ekitiibwa n'obulamu Ye mpeera ey'okwetoowazanga n'okutyanga Mukama.

⁵ Amaggwa n'ebyambika biri mu kkubo ery'omubambaavu: Akuuma emmeeme ye alibibeera wala.

⁶ Manyiiza omwana omuto mu kkubo erimugwanira okutambuliramu, Awo newakubadde nga mukadde talirivaamu.

⁷Omugagga afuga abaavu, N'eyeewola aba muddu w'awola.

⁸ Asiga obutali butuukirivu alikungula obuyinike: N'omuggo ogw'obusungu bwe guliggwaawo.

⁹ Alina eriiso erigabaagaba anaabanga n'omukisa; Kubanga awa omwavu ku mmere ye.

¹⁰ Gobanga omunyoomi, n'okuyomba kunaavangawo; Weewaawo, okuwakana n'okuswazibwa birikoma.

¹¹ Ayagala omutima omulongoofu, Olw'ekisa eky'omu mimwa gye kabaka kyanaavanga abeera mukwano gwe.

¹²Amaaso ga Mukama gakuuma oyo alina okumanya, Naye asuula ebigambo eby'omuntu asala enkwe.

¹³ Omugayaavu ayogera nti Empologoma eri bweru: N'attirwa mu nguudo.

¹⁴ Akamwa k'abakazi abagenyi bunnya buwanvu: Akyayibwa Mukama aligwa omwo.

¹⁵ Obusirusiru busibibwa mu mutima gw'omwana omuto; Naye omuggo ogukangavvula gulibugobera wala okuva gy'ali.

¹⁶ Ajooga omwavu okwongera ku magoba ge, N'oyo agabira omugagga batuuka mu kwetaaga bwetaazi.

¹⁷Tega okutu kwo owulire ebigambo eby'ab'amagezi, Era ssaayo omutima gwo eri okumanya kwange.

¹⁸Kubanga kigambo kya ssanyu bw'obeera nabyo mu nda yo, Bwe binywerera wamu ku mimwa gyo.

¹⁹Obwesige bwo bube eri Mukama, Kyenvudde nkubimanyisa leero ggwe.

²⁰Sikuwandiikidde birungi nnyo nnyini Eby'okuteesa n'eby'okumanya;

²¹ Okukutegeeza ebigambo eby'amazima bwe bitabuusibwabuusibwa, Olyoke obaddize ebigambo eby'amazima abo abakutuma?

²² Tonyaganga mwavu kubanga mwavu, So tojooganga abonyaabonyezebwa mu mulyango:

²³ Kubanga Mukama ye aliwoza ensonga yaabwe, Era abo ababanyaga alibanyagako obulamu.

²⁴Tokwananga muntu wa busungu: Togendanga na muntu ow'ekiruyi:

²⁵Olemenga okuyiga amakubo ge, N'ofunira emmeeme yo ekyambika.

²⁶ Tobanga ku muwendo gw'abo abakuba mu ngalo, Newakubadde ogw'abo abeeyimirira amabanja:

²⁷Oba nga tolina kya kusasula, Lwaki akuggirawo ekitanda kyo wansi wo?

²⁸ Tojjululanga kabonero ka nsalo ak'edda, Bajjajjaabo ke baasimba.

²⁹ Olaba omuntu anyiikira mu mulimu gwe? aliyimirira mu maaso ga bakabaka; Taliyimirira mu maaso ga bakopi.