Read luganda Engero 23 Bible Online

Engero 23 - luganda bible

Engero 23

¹Bw'otuulanga ku mmere wamu n'omukungu, Olowoolezanga ddala oyo ali mu maaso go;

²Era weeteekenga akambe ku bulago bwo, Oba nga oli muntu muluvu.

³Teweegombanga nva ze ennungi; Kubanga bye byokulya eby'obulimba.

⁴ Teweekooyanga okuba omugagga; Vanga ku magezi go ggwe.

⁵ Oneekalirizanga amaaso ku ekyo ekitaliiwo? Kubanga mazima obugagga bwefunira ebiwaawaatiro, Ng'empungu ebuuka mu bbanga.

⁶ Tolyanga mmere y'oyo alina eriiso ebbi, So teweegombanga nva ze nnungi:

⁷ Kubanga nga bw'alowooza mu nda ye, bw'ali bw'atyo: Lya, nywa, bw'akugamba; Naye omutima gwe teguli wamu naawe.

⁸Ennoga gy'olidde onoogisesema, N'ofiirwa ebigambo byo ebirungi.

⁹Toyogeranga omusirusiru ng'awulira; Kubanga anaanyooma amagezi ag'ebigambo byo.

¹⁰ Tojjululanga kabonero ka nsalo ak'edda; So toyingiranga mu nnimiro ez'abatalina bakitaabwe:

¹¹ Kubanga omununuzi waabwe wa maanyi; Anaawozanga ensonga yaabwe naawe.

¹²Ssangayo omutima gwo eri okuyigirizibwa, N'amatu go eri ebigambo eby'okumanya.

¹³ Tolekanga kubuulirira omwana: Kubanga bw'onoomukubanga n'omuggo, talifa.

¹⁴Omukubanga n'omuggo, N'owonya emmeeme ye mu magombe.

¹⁵ Mwana wange, omutima gwo oba nga gwa magezi, Omutima gwange gunaasanyuka, ogwange:

¹⁶Weewaawo, emmeeme yange eneesanyuka, Emimwa gyo bwe gyogera eby'ensonga.

¹⁷ Omutima gwo gulemenga okukwatirwa obuggya abalina ebibi: Naye obeerenga mu kutya Mukama okuzibya obudde:

¹⁸ Kubanga mazima empeera weeri; N'essuubi lyo teririmalibwawo.

¹⁹ Mwana wange, wulira obeerenga n'amagezi, Oluŋŋamyenga omutima gwo mu kkubo.

²⁰ Tobanga ku muwendo gw'abo abeekamirira omwenge; Mu abo abeevuubiika ennyama:

²¹ Kubanga omutamiivu n'omuluvu balituuka mu bwavu: N'okubongoota kunaayambazanga omuntu enziina.

²² Owuliranga kitaawo eyakuzaala, So tonyoomanga nnyoko ng'akaddiye.

²³ Gulanga amazima, so togatundanga; Weewaawo, amagezi n'okuyigirizibwa n'okutegeera.

²⁴Kitaawe w'omutuukirivu anaasanyukanga nnyo: N'oyo azaala omwana ow'amagezi anaabanga n'essanyu.

²⁵Kitaawo ne nnyoko basanyukenga, N'omukazi eyakuzaala ajaguzenga.

²⁶Mwana wange, mpa omutima gwo, N'amaaso go gasanyukirenga amakubo gange.

²⁷ Kubanga omukazi omwenzi lukonko luwanvu; N'omukazi omugenyi bunnya bwa kanyigo.

²⁸ Weewaawo, ateega ng'omunyazi, Era ayaza abasala enkwe mu bantu.

²⁹ Ani alaba obuyinike? ani alaba ennaku? ani alina ennyombo? Ani alina okwemulugunya? ani alina ebiwundu eby'obwereere? Ani amyusa amaaso?

³⁰ Abo abalwawo ku mwenge; Abo abagenda okunoonya omwenge omutabule.

³¹Totunuuliranga mwenge nga gumyuse, Bwe gwolesanga ebbala lyagwo mu kikompe, Bwe gukka empola:

³² Enkomerero guluma ng'omusota, Gusonsomola ng'embalasaasa.

³³Amaaso go galiraba eby'ekitalo, N'omutima gwo gulyogera ebigambo eby'obubambaavu.

³⁴Weewaawo, oliba ng'oyo agalamira wakati mu nnyanja, Oba ng'oyo agalamira waggulu ku mulongooti.

³⁵ Bankubye, bw'olyogera bw'otyo, ne ssirumwa; Bankubye, ne ssiwulira: Ndyebaka ddi? naagunoonya nate omulundi ogw'okubiri.