Read luganda Engero 24 Bible Online

Engero 24 - luganda bible

Engero 24

¹ Tokwatirwanga buggya abantu ababi, So teweegombanga okuba awamu nabo:

² Kubanga omutima gwabwe guteesa okujooga, N'emimwa gyabwe gyogera ku ttima.

³ Amagezi ge gazimbya ennyumba; N'okutegeera kwe kuginyweza:

⁴ N'okumanya kwe kujjuza ebisenge Obugagga bwonna obw'omuwendo omungi era obusanyusa.

⁵ Omuntu ow'amagezi aba wa maanyi; Weewaawo, omuntu alina okumanya ayongera obuyinza.

⁶ Kubanga olirwana olutalo lwo n'okuteesa okw'amagezi: Era mu bateesa ebigambo abangi mwe muli emirembe.

⁷Amagezi magulumivu nnyo, galema omusirusiru: Tayasama kamwa ke mu mulyango.

⁸Agunja okukola obubi, Abantu balimuyita omuntu ow'ettima.

⁹ Okulowooza kw'omusirusiru kwonoona: Era omunyoomi wa muzizo eri abantu.

¹⁰ Bw'ozirika ku lunaku olw'okulabirako obuyinike, Amaanyi go nga matono.

¹¹ Obawonyanga abo abatwalibwa okuttibwa, N'abo abagenda okuttibwa obalekanga.

¹² Bw'onooyogeranga nti Laba, tetwamanya kino: Oyo apima emitima takirowooza? N'oyo akuuma emmeeme yo takimanyi? Era talisasula buli muntu ng'omulimu gwe bwe guli?

¹³ Mwana wange, olyanga omubisi gw'enjuki, kubanga mulungi; N'ebisenge byazo ebiwoomera amatama go:

¹⁴ Onoomanyanga ng'amagezi gawoomera bwe gatyo emmeeme yo: Oba ng'ogalabye, awo walibaawo empeera, N'essuubi lyo teririmalibwawo.

¹⁵ Toteegera ku nnyumba ya mutuukirivu, ggwe omuntu omubi; Tonyaga kifo ky'awummuliramu:

¹⁶ Kubanga omuntu omutuukirivu agwa emirundi musanvu n'ayimuka nate: Naye ababi obuyinike bubasuula.

¹⁷ Tosanyukanga omulabe wo bw'agwanga, So n'omutima gwo gulemenga okusanyuka bw'ameggebwanga:

¹⁸Mukama alemenga okukiraba ne kimunyiiza, N'akyusa obusungu bwe okumuvaako.

¹⁹ Teweeraliikiriranga olw'abo abakola obubi; So tokwatirwanga buggya ababi:

²⁰ Kubanga tewaliba mpeera eri omuntu omubi; Ettabaaza ey'ababi erizikizibwa.

²¹ Mwana wange, otyanga Mukama ne kabaka: So teweetabulanga n'abo abaagala okujjululajjulula.

²²Kubanga obuyinike bwabwe buliyimuka nga tebamanyiridde; Era ani amanyi okuzikirira kwabwe bombi?

²³ Era na bino bigambo bya bagezigezi. Okusosola mu bantu bw'osala emisango si kirungi.

²⁴ Agamba omubi nti Ggwe mutuukirivu; Abantu banaamukolimiranga, amawanga ganaamutamwanga:

²⁵Naye abo abamunenya be baliba n'essanyu, N'omukisa omulungi gulibatuukako.

²⁶Addamu eby'ensonga Anywegera emimwa.

²⁷Teekateekanga omulimu gwo ebweru, Ogwetegekerenga mu nnimiro; Oluvannyuma n'olyoka ozimba ennyumba yo.

²⁸ Tolumirizanga munno awatali nsonga: So tolimbanga na mimwa gyo.

²⁹ Toyogeranga nti Ndimukola nga ye bw'ankoze nze; Ndisasula omusajja oyo ng'omulimu gwe bwe gubadde.

³⁰Nayita ku nnimiro ey'omugayaavu, N'olusuku olw'emizabbibu lw'oyo atalina kutegeera;

³¹ Kale, laba, amaggwa nga galubunye lwonna, Omwennyango nga gubisse ku lwo kungulu, N'olukomera lwalwo olw'amayinja nga lusuuliddwa.

³²Awo ne ntunula ne ndowooza nnyo: N'alaba ne mpeebwa okuyigirizibwa.

³³ Wakyaliwo okwebaka kutono, okubongoota kutono, Okufunya engalo okwebaka kutono:

³⁴Bwe kityo obwavu bwo bulituuka ng'omunyazi; N'okwetaaga kwo ng'omusajja akutte ebyokulwanyisa.