Read luganda Engero 29 Bible Online

Engero 29 - luganda bible

Engero 29

¹ Omuntu akakanyaza ensingo ye bw'anenyezebwa emirundi emingi Alimenyeka nga tamanyiridde awatali kuwonyezebwa.

² Abatuukirivu bwe beeyongera, abantu basanyuka: Naye omuntu omubi bw'afuga, abantu basinda.

³ Buli ayagala amagezi asanyusa kitaawe: Naye oyo abeera n'abakazi abenzi amalawo ebintu bye.

⁴Kabaka anyweza ensi lwa kusala misango: Naye asolooza enguzi agisuula.

⁵ Omuntu anyumiriza munne Ategera ebigere bye ekitimba.

⁶ Mu kusobya kw'omuntu omubi mulimu ekyambika: Naye omutuukirivu ayimba n'asanyuka.

⁷ Omutuukirivu yeetegereza ensonga ey'abaavu: Naye omubi talina kutegeera okugimanya.

⁸Abantu abanyooma basasamaza ekibuga: Naye abantu ab'amagezi bakyusa obusungu ne buvaawo.

⁹Omuntu ow'amagezi bw'aba n'empaka n'omuntu omusirusiru, Oba nga asunguwala oba nga aseka, tewaliba kuwummula.

¹⁰ Abayagala omusaayi bakyawa oyo eyatuukirira: N'omugolokofu banoonya obulamu bwe.

¹¹Omusirusiru ayatula obusungu bwe bwonna: Naye omuntu ow'amagezi abuziyiza n'abukkakkanya.

¹²Omukulu bw'awulira eby'obulimba, Abaddu be bonna baba babi.

¹³ Omwavu n'omujoozi balabagana: Mukama ayakira amaaso gaabwe bombi.

¹⁴ Kabaka asalira abaavu emisango n'obwesigwa, Entebe ye eneenywezebwanga emirembe gyonna.

¹⁵ Omuggo n'okunenya bireeta amagezi: Naye omwana gwe balekera awo akwasa nnyina ensonyi.

¹⁶ Ababi bwe beeyongera, okusobya kweyongera: Naye abatuukirivu balitunuulira okugwa kwabwe.

¹⁷ Buuliriranga omwana wo, anaakuwanga okuwummula; Weewaawo, anaasanyusanga emmeeme yo.

¹⁸ Awatali kwolesebwa, abantu basuula okuziyizibwa: Naye akwata amateeka alina omukisa.

¹⁹Omuddu taganya kubuulirirwa lwa bigambo: Kubanga ne bw'ategeera talissaayo mwoyo.

²⁰ Olaba omuntu ayanguyiriza ebigambo bye? Omusirusiru asuubirwa okukira ye.

²¹ Alera omuddu we nga yeekanasa okuva mu buto bwe Alimufuukira omwana ku nkomerero.

²² Omuntu ow'obusungu aleeta ennyombo, N'ow'ekiruyi okusobya kwe kuba kungi nnyo nnyini.

²³ Amalala ag'omuntu galimutoowaza: Naye alina omwoyo ogwetoowaza alifuna ekitiibwa.

²⁴ Buli assa ekimu n'omubi akyawa obulamu bwe ye: Awulira okulayizibwa n'atabaako ky'ayogera.

²⁵ Okutya abantu kuleeta ekyambika: Naye buli eyeesiga Mukama anaabanga mirembe.

²⁶ Bangi abaagala okuganja eri omukulu: Naye omusango gw'omuntu guva eri Mukama.

²⁷Omuntu atali wa nsonga wa muzizo eri abatuukirivu: N'oyo akwata ekkubo eggolokofu wa muzizo eri ababi.