Read luganda Engero 30 Bible Online

Engero 30 - luganda bible

Engero 30

¹ Ebigambo bya Aguli mutabani wa Yake; ebyalagulwa. Omusajja agamba Isyeri ne Ukali;

² Nti Mazima nninga ensolo okusinga omuntu yenna, So sirina kutegeera kwa muntu:

³So siyiganga magezi, So sirina kumanya kw'oyo Omutukuvu.

⁴ Ani eyali alinnye mu ggulu n'akka? Ani eyali akuŋŋaanyizza empewo mu bikonde bye? Ani eyali asibye amazzi mu kyambalo kye? Ani eyali anywezezza enkomerero zonna ez'ensi Erinnya lye ye ani, n'omwana we erinnya lye ye ani, oba ng'omanyi?

⁵ Buli kigambo kya Katonda kikemebwa: Aba ngabo eri abo abamwesiga.

⁶ Toyongeranga ku bigambo bye, Aleme okukunenyanga naawe n'olabika ng'omulimba.

⁷Nkusabye ebigambo bibiri; Tonnyima nga sinnafa:

⁸ Ggyangawo ebigambo ebitaliimu n'eby'obulimba bibe wala nange: Tompanga bwavu newakubadde obugagga; Ndisanga emmere gye nneetaaga:

⁹ Nneme okukkutanga ne nkwegaana ne njogera nti Mukama ye ani? Era nnemenga okuba omwavu ne nziba, Ne njogera bubi erinnya lya Katonda wange.

¹⁰ Towaayirizanga muddu eri mukama we, Alemenga okukukolimira naawe n'olowoozebwa ng'ozizza omusango.

¹¹ Waliwo abantu abakolimira kitaabwe, So tebasabira nnyaabwe omukisa.

¹² Waliwo abantu ababa abalongoofu mu maaso gaabwe bo, Era naye tebanaazibwako empitambi yaabwe.

¹³ Waliwo abantu, amaaso gaabwe nga malalambavu! N'ebikowe byabwe bigulumizibwa.

¹⁴ Waliwo abantu amannyo gaabwe bitala, n'amasongezo gaabwe bwambe, Okulya abaavu okubamalawo ku nsi, n'abeetaaga mu bantu.

¹⁵Ekinoso kirina abawala baakyo babiri aboogerera waggulu nti Mpa, mpa. Waliwo ebintu bisatu ebitakkuta ennaku zonna, Weewaawo, ebina ebitayogera nti Lekera awo:

¹⁶ Amagombe; n'olubuto olugumba; N'ensi etekkuta mazzi; N'omuliro ogutayogera nti Lekera awo.

¹⁷ Eriiso erikudaalira kitaawe, Ne linyooma okugondera nnyina, Bannamuŋŋoona ab'omu kiwonvu baliriggyamu, N'empungu ziririrya.

¹⁸Waliwo ebigambo bisatu eby'ekitalo ebinnema, Weewaawo, ebina bye ssimanyi:

¹⁹Ekkubo ery'empungu mu bbanga; Ekkubo ery'omusota ku lwazi; Ekkubo ery'eryato wakati mu nnyanja; N'ekkubo ery'omusajja n'omuwala.

²⁰Bwe lityo bwe libeera ekkubo ery'omukazi omwenzi; Alya n'asangula ku mimwa gye, N'ayogera nti Siriiko bubi bwe nkoze.

²¹Ensi ekankanira ebigambo bisatu, Era ebina by'eteyinza kugumiikiriza:

²² Omuddu bw'aba kabaka; N'omusirusiru bw'akkuta emmere;

²³Omukazi omugwagwa bw'afumbirwa; N'omuzaana asikira mugole we.

²⁴Waliwo ebintu bina ebitono ku nsi, Naye birina amagezi mangi nnyo nnyini:

²⁵ Enkolooto lye ggwanga eritalina maanyi, Naye zeeterekera emmere yaazo mu kyeya;

²⁶ Obumyu buntu bunafu, Naye bwezimbira ennyumba zaabwo mu mayinja;

²⁷ Enzige tezirina kabaka, Naye zitabaala zonna bibiina bibiina;

²⁸Omunya gukwata n'engalo zaagwo, Naye gubeera mu mayumba ga bakabaka.

²⁹Waliwo ebintu bisatu ebyesimba obulungi mu kutambula kwabyo, Weewaawo, ebina ebyesimba obulungi mu kugenda:

³⁰Empologoma esinga ensolo zonna amaanyi, So tewali gy'esegulira yonna;

³¹Embwa enjizzi; era n'embuzi ennume; Ne kabaka atagolokokerwako.

³² Oba ng'okoze eby'obusirusiru nga weegulumiza, Oba ng'olowoozezza obubi, Teekanga omukono gwo ku kamwa ko.

³³Kubanga okusunda amata kuleeta omuzigo, N'okunyigiriza ennyindo kuleeta omusaayi: N'okunyigiriza kw'obusungu bwe kutyo kuleeta oluyombo.