Read luganda Engero 4 Bible Online

Engero 4 - luganda bible

Engero 4

¹Baana bange, muwulirenga okuyigiriza kwa kitammwe, Mutegenga amatu okumanya okutegeera:

²Kubanga mbawa okuyiga okulungi; Temuvanga mu tteeka lyange.

³Kubanga nali mwana eri kitange, Omugonvu era eyayagalibwanga nzekka mu maaso ga mmange.

⁴ Era yanjigirizanga n'aŋŋamba nti Omutima gwo gunywezenga ebigambo byange; Kwatanga ebiragiro byange obeerenga omulamu:

⁵ Funa amagezi, funa okutegeera; Togeerabiranga so tovanga mu bigambo eby'omu kamwa kange:

⁶ Togalekanga, nago ganaakukuumanga; Ogaagalanga nago ganaakulindanga.

⁷Amagezi kye kigambo ekisinga obukulu; kale funa amagezi: Weewaawo, funa okutegeera n'ebyo byonna bye wafunanga.

⁸Gagulumizenga nago galikukuza: Galikutuusa mu kitiibwa, bw'onoogawambaatiranga.

⁹ Galiwa omutwe gwo engule ey'obuyonjo: Galikugabira enkuufiira ey'obulungi.

¹⁰Ai mwana wange, wulira okkirizenga ebigambo byange; N'emyaka egy'obulamu bwo giriba mingi.

¹¹Naakuyigiriza ekkubo ery'amagezi; Naakuluŋŋamya mu makubo ag'obugolokofu.

¹² Bw'onootambulanga ebigere byo tebiifundikirwenga; Era bw'onoddukanga teweesittalenga.

¹³Nywerezanga ddala okuyigirizibwa; tokutanga: Kukwatenga; kubanga bwe bulamu bwo.

¹⁴ Toyingiranga mu kkubo ery'ababi, So totambuliranga mu lugendo olw'abasajja ababi.

¹⁵Olwesambanga, toluyitangako; Okyukanga okuluvaamu, weeyongerenga mu maaso.

¹⁶ Kubanga tebeebaka wabula nga bamaze okukola akabi; N'otulo tubaggibwako wabula nga baliko be bagwisizza.

¹⁷Kubanga balya emmere ey'obubi, Ne banywa omwenge ogw'okugira ekyejo.

¹⁸ Naye ekkubo ery'abatuukirivu liriŋŋanga omusana ogwakayakana, Ogweyongerayongera okwaka okutuusa obudde lwe butuukirira.

¹⁹ Ekkubo ery'ababi liriŋŋanga ekizikiza: Tebamanyi ekibeesittaza.

²⁰Mwana wange, ssangayo omwoyo eri ebigambo byange; Teganga okutu eri okwogera kwange.

²¹Tebivanga ku maaso go; Bikuumirenga wakati mu mutima gwo.

²² Kubanga ebyo bwe bulamu eri abo ababiraba, Era kwe kulama eri omubiri gwabwe gwonna.

²³ Onyiikiranga nnyo nnyini okukuumanga omutima gwo; Kubanga omwo mwe muva ensulo ez'obulamu.

²⁴Weggyengako akamwa akabambaavu, N'emimwa emikyamu ogyewalanga nnyo.

²⁵ Amaaso go galuŋŋamirenga ddala, N'ebikowe byo bitunuulirenga ddala emberi yo.

²⁶ Tereezanga ekkubo ery'ebigere byo, Era amagenda go gonna ganywerenga.

²⁷ Tokyamiranga ku mukono ogwa ddyo newakubadde ku gwa kkono: Ggyawo ekigere kyo obutakola bubi.