Read luganda Engero 6 Bible Online

Engero 6 - luganda bible

Engero 6

¹ Mwana wange, oba nga weeyimirira muliraanwa wo, N'okubira omugenyi mu ngalo,

²Ebigambo eby'omu kamwa ko bikukwasizza, Ebigambo eby'omu kamwa ko bikuteze.

³ Kale nno, mwana wange, kola kino weerokole, Kubanga ogudde mu mukono gwa muliraanwa wo; Genda weetoowaze otayirire muliraanwa wo.

⁴ Toganyanga maaso go kwebaka, Newakubadde ebikowe byo okubongoota.

⁵ Weerokole ng'empeewo bw'eva mu mukono gw'omuyizzi, Era ng'ennyonyi bw'eva mu mukono gw'omutezi.

⁶ Genda eri enkolooto, ggwe omugayaavu; Lowooza empisa zaayo obeerenga n'amagezi:

⁷ Eyo terina mwami, Newakubadde omulabirizi newakubadde afuga,

⁸ Naye ne yeeterekera ebyayo ebyokulya mu biro eby'okukunguliramu, N'ekuŋŋaanya emmere yaayo mu mwaka.

⁹Olituusa wa okwebakanga, ggwe omugayaavu? Oligolokoka ddi mu tulo two?

¹⁰Wakyaliwo okwebaka okutono n'okubongoota okutono, N'okufunya emikono okutono okwebaka:

¹¹ Bwe kityo obwavu bwo bulijja ng'omunyazi, N'okwetaaga kwo ng'omusajja akutte ebyokulwanyisa.

¹²Omuntu ataliiko ky'agasa, omusajja ow'obutali butuukirivu; Atambula ng'alina akamwa akabambaavu;

¹³ Atemya amaaso, ayogeza bigere bye, Abagula n'engalo ze;

¹⁴Obubambaavu buli mu mutima gwe, asala obubi olutata; Asiga okukyawagana.

¹⁵ Ennaku z'aliraba kyeziriva zijja nga tamanyiridde; Amangu ago alimenyeka, awatali kuwonyezebwa.

¹⁶Waliwo ebigambo mukaaga Mukama by'akyawa; Weewaawo, musanvu bya muzizo gy'ali:

¹⁷ Amaaso ag'amalala, olulimi olulimba, N'engalo eziyiwa omusaayi ogutaliiko musango;

¹⁸ Omutima oguyunja ebirowoozo ebibi, Ebigere ebyanguwa embiro okugoberera ettima;

¹⁹ Omujulirwa w'obulimba ayogera eby'obulimba, N'oyo asiga okukyawagana mu b'oluganda.

²⁰Mwana wange, okwatanga ekiragiro kya kitaawo, So tolekanga tteeka lya nnyoko:

²¹ Bisibenga ennaku zonna ku mutima gwo, Binywezenga mu bulago bwo.

²² Bw'onootambulanga, linaakukulemberanga; Bw'oneebakanga, linaakukuumanga: Era bw'onoozuukukanga, linaayogeranga naawe.

²³ Kubanga etteeka ttabaaza; ekiragiro musana; N'okunenya kw'oyo akuyigiriza lye kkubo ery'obulamu:

²⁴Okukuumanga eri omukazi omubi, Eri okunyumiriza kw'olulimi lw'omugenyi.

²⁵ Teweegombanga bulungi bwe mu mutima gwo; So n'ebikowe bye biremenga okukukwasa.

²⁶ Kubanga olw'omukazi omwenzi omuntu afuuka mmere bumere: N'omukazi omwenzi ayigga obulamu obw'omuwendo omungi.

²⁷ Omuntu ayinza okuwambaatira omuliro mu kifuba kye, Ebyambalo bye ne bitaggya?

²⁸Oba omuntu ayinza okutambulira ku manda agookya, Ebigere bye ne bitasiriira?

²⁹Bw'atyo bw'abeera ayingira eri omukazi wa munne; Buli amukomako talirema kubonerezebwa.

³⁰Abantu tebanyooma mubbi oba ng'abba Okukkusa emmeeme ye ng'alumiddwa enjala:

³¹ Naye bw'anaalabikanga, anaagattanga emirundi musanvu; Anaawangayo ebintu byonna eby'omu nnyumba ye.

³² Ayenda ku mukazi talina kutegeera: Ayagala okuzikiriza obulamu bwe ye ye akola bw'atyo.

³³Alifuna ebiwundu n'okunyoomebwa; N'ekivume kye tekirisangulibwa.

³⁴ Kubanga obuggya kye kiruyi ky'omusajja; So talisaasira ku lunaku olw'okuwalanirako eggwanga.

³⁵Talissaayo mwoyo eri ekinunulo kyonna; So talinyiigulukuka newakubadde ng'owa ebirabo ebingi.