Read luganda Engero 7 Bible Online

Engero 7 - luganda bible

Engero 7

¹Mwana wange, okwatanga ebigambo byange, Oterekanga ebiragiro byange ewuwo.

² Okwatanga ebiragiro byange obeerenga omulamu; N'etteeka lyange ng'emmunye ey'eriiso lyo.

³ Bisibenga ku mukono gwo; Biwandiikenga ku bipande eby'omutima gwo.

⁴Gambanga amagezi nti Ggwe mwannyinaze; Oyitenga okutegeera ow'ekika kyammwe:

⁵ Bikukuumenga eri omukazi omugenyi, Eri omugenyi anyumiriza n'ebigambo bye.

⁶Kubanga nalingiza mu ddirisa ery'ennyumba yange Mu mulimu omuluke ogw'omu ddirisa;

⁷Ne ndaba mu batalina magezi, Ne ntegereza mu balenzi, Omuvubuka atalina kutegeera,

⁸Ng'ayita mu luguudo kumpi ku mugguukiriro gwe, N'agenda mu kkubo eridda mu nnyumba ye;

⁹ Mu kizikiza, obudde nga buwungedde; Mu kizikiza eky'ekiro zigizigi.

¹⁰Kale, laba, ne wamusisinkana omukazi Ng'ayambadde ebyambalo eby'omwenzi, era ow'omutima omugerengetanya.

¹¹ Muyombi era mukakanyavu; Ebigere bye tebibeera mu nnyumba ye:

¹²Oluusi aba mu nguudo, oluusi mu bifo ebigazi, Era ateegera ku buli mugguukiriro.

¹³Awo n'amukwata n'amunywegera, N'amugamba ng'amusimbye amaaso nti

¹⁴ Ssaddaaka ez'ebiweebwayo olw'emirembe ziri wange; Leero mmaze okusasula obweyamo bwange.

¹⁵Kyenvudde nfuluma okukusisinkana, Okunyiikira okunoonya amaaso go, era nkulabye.

¹⁶ Njaze ekitanda kyange n'amagodooli, N'engoye ez'amakuubo eza ppamba w'e Misiri.

¹⁷ Mpunyisizza bulungi ekiriri kyange N'obubaane n'omugavu n'eby'akaloosa.

¹⁸Jjangu tukkute okwagala okukeesa obudde; Twesanyuse n'okwagala.

¹⁹Kubanga baze tali ka, Yatambula lugendo lwa wala:

²⁰Yagenda ng'atwala ensawo eya ffeeza; Alikomawo omwezi nga gwa ggabogabo.

²¹ Amukkirizisa n'ebigambo bye ebirungi bingi, Amuwaliriza okugenda n'okwegonza okw'emimwa gye.

²²Amangu ago agenda amugoberera, Ng'ente bw'egenda okusalibwa, Oba ng'amasamba bwe gagenda okukangavvula omusirusiru;

²³ Okutuusa akasaale lwe kalifumita ekibumba kye; Ng'ennyonyi bw'eyanguwa okugwa mu kyambika, So tamanyi ng'alifiirwa obulamu bwe.

²⁴Kale nno, baana bange, mumpulirenga, Era mussengayo omwoyo eri ebigambo eby'omu kamwa kange.

²⁵Omutima gwo tegukyamiranga mu makubo ge, Towabiranga mu mpenda ze.

²⁶ Kubanga yasuula bangi nga bafumitiddwa ebiwundu: Weewaawo, ababe abattibwa ggye ddene.

²⁷ Ennyumba ye lye kkubo lyennyini eridda mu magombe Nga likka mu bisenge eby'okufa.