Read luganda Oluyimba 1 Bible Online

Oluyimba 1 - luganda bible

Oluyimba 1

¹ Oluyimba olusinga ennyimba, lwe lwa Sulemaani.

²Annywegere n'okunywegera kw'akamwa ke: Kubanga okwagala kwo kusinga omwenge obulungi.

³ Amafuta go gawunya akaloosa; Erinnya lyo liriŋŋanga amafuta agafukibwa; Abawala abatamanyi musajja kyebava bakwagala.

⁴ Mpalula: tunaakugoberera mbiro: Kabaka annyingizizza mu bisenge bye: Tunaakusanyukira ne tujaguza, Okwagala kwo tunaakwogerako okusinga omwenge: Bakwagala lwa nsonga.

⁵Ndi muddugavu, naye mulungi, Mmwe abawala ba Yerusaalemi, Ng'eweema ez'e Kedali. Ng'amagigi ga Sulemaani.

⁶ Temuntunuulira kubanga ndi muddugavu. Kubanga omusana gunjokezza. Abaana ba mmange bansuguwalira, Banfuula omukuumi w'ensuku ez'emizabbibu; Naye olusuku lwange nze saalukuuma.

⁷ Mbuulira, ggwe emmeeme yange gw'eyagala, Gy'oliisiza ekisibo kyo, gy'okigalamiriza mu ttuntu; Kubanga nandibeeredde ki ng'ayambadde ekibikka ku maaso Awali ebisibo bya banno?

⁸Oba nga tomanyi, ggwe asinga abakazi bonna obulungi, Fuluma okwate ekkubo ogoberere ebigere by'endiga zo, Oliisize abaana b'embuzi zo awali eweema ez'abasumba.

⁹ Nkufaananyizza, ai muganzi wange, Embalaasi eri ku magaali ga Falaawo.

¹⁰ Amatama go malungi n'emivumbo emirange, Ensingo yo nnungi n'embu ez'eby'obuyonjo.

¹¹Tunaakukolera emivumbo egya zaabu N'amapeesa aga ffeeza.

¹² Kabaka bwe yali ng'atudde ku mmeeza ye, Amafuta gange ag'omugavu ne gawunya akaloosa kaago.

¹³Muganzi wange ali gye ndi ng'omuvumbo gwa mooli, Oguteekebwa wakati w'amabeere gange.

¹⁴Muganzi wange ali gye ndi ng'ekisaaganda ky'ebimuli ebya kofera Mu nsuku ez'emizabbibu ez'e Engedi.

¹⁵ Laba, oli mulungi, gwe njagala; laba, oli mulungi; Amaaso go mayiba.

¹⁶Laba, oli mulungi, muganzi wange, weewaawo, wa kusanyusa: Era ekitanda kyaffe kya malagala mato.

¹⁷Emikiikiro gy'ennyumba yaffe mivule, N'enzooba zaffe nkanaga.