Read luganda Oluyimba 2 Bible Online

Oluyimba 2 - luganda bible

Oluyimba 2

¹Nze ndi kimyula kya Saloni, Eddanga ery'omu biwonvu.

²Ng'eddanga mu maggwa, Gwe njagala bw'ali bw'atyo mu bawala.

³ Ng'omucungwa mu miti egy'omu kibira, Muganzi wange bw'ali bw'atyo mu balenzi. Natuula wansi w'ekisiikirize kye n'essanyu lingi, Ebibala bye ne biwoomera amatama gange.

⁴Yannyingiza mu nju ey'okuliiramu embaga, Ne bendera ye eyali ku nze kwagala.

⁵Munkwatirire n'ezabbibu enkalu, munsanyuse n'amacungwa; Kubanga okwagala kundwazizza.

⁶ Omukono gwe ogwa kkono guli wansi w'omutwe gwange, N'omukono gwe ogwa ddyo gunkutte.

⁷ Mbalayiza, mmwe abawala ba Yerusaalemi, Olw'empeewo n'enjaza ez'omu ttale, Muleme okugolokosa newakubadde okuzuukusa okwagala, Okutuusa we kunaayagalira.

⁸Eddoboozi lya muganzi wange! laba, ajja, Ng'abuukirabuukira ku nsozi, ng'azinira ku busozi.

⁹Muganzi wange ali ng'empeewo oba ennangaazi ento: Laba, ayimirira ennyuma w'olukomera lwaffe, Alingiza mu ddirisa, Yeeraga ng'alabikira mu mulimu ogulukibwa ogw'omu kituli.

¹⁰Muganzi wange yayogera n'aŋŋamba Nti Golokoka, gwe njagala, omulungi gye ndi, tugende tuveewo.

¹¹Kubanga, laba, ttoggo aweddeko, Enkuba eyise egenze;

¹² Ebimuli birabise ku ttaka; Ebiro bituuse ennyonyi mwe ziyimbira, N'eddoboozi lya kaamukuukulu liwulirwa mu nsi yaffe;

¹³ Omutiini gwengeza ettiini zaagwo embisi, N'emizabbibu gimulisizza, Giwunya akaloosa kaagyo. Golokoka, gwe njagala, omulungi gye ndi, tugende tuveewo.

¹⁴ Ai ejjiba lyange, abeera mu njatika ez'omu jjinja, mu bwekwekero obw'ebbanga, Ndabe amaaso go, mpulire eddoboozi lyo; Kubanga eddoboozi lyo ddungi, n'amaaso go ga kusanyusa.

¹⁵Mutukwatire ebibe, ebibe ebito, ebyonoona ensuku ez'emizabbibu; Kubanga ensuku zaffe ez'emizabbibu zimulisizza.

¹⁶ Muganzi wange wange, nange ndi wuwe: Aliisizza ekisibo kye mu malanga.

¹⁷ Okutuusa obudde nga bukedde, ebisiikirize ne biddukira ddala, Kyuka, muganzi wange, obe ng'empeewo oba ennangaazi ento Ku nsozi eza Beseri.