Read luganda Isaaya 43 Bible Online

Isaaya 43 - luganda bible

Isaaya 43

¹ Naye kaakano bw'atyo bw'ayogera Mukama eyakutonda, ggwe Yakobo, era eyakubumba, ggwe Isiraeri, nti Totya, kubanga nakununula; nakuyita erinnya lyo, oli wange.

² Bw'onooyitanga mu mazzi, naabeeranga naawe; ne mu migga, tegirikusaanyaawo: bw'onootambulanga okuyita mu muliro, toosiriirenga; so n'omuliro tegulyakira ku ggwe.

³ Kubanga nze ndi Mukama Katonda wo, Omutukuvu wa Isiraeri, omulokozi wo; nawaayo Misiri okuba ekinunulo kyo, Kuusi ne Seba ku lulwo.

⁴Kubanga wali wa muwendo mungi mu maaso gange, era wa kitiibwa, nange nakwagala; kyendiva mpaayo abasajja ku lulwo n'amawanga ku lw'obulamu bwo.

⁵ Totya; kubanga nze ndi wamu naawe: ndireeta ezzadde lyo okuliggya ebuvanjuba ne nkukuŋŋaanya okuva ebugwanjuba;

⁶ndigamba obukiika obwa kkono nti Waayo; n'obukiika obwa ddyo nti Togaana nabo; leeta batabani bange okubaggya ewala ne bawala bange okuva ku nkomerero y'ensi;

⁷buli muntu eyatuumibwa erinnya lyange era gwe nnatondera ekitiibwa kyange; nze namubumba; weewaawo, namukola.

⁸ Fulumya abazibe b'amaaso abalina amaaso n'abaggavu b'amatu abalina amatu.

⁹ Amawanga gonna gakuŋŋaanyizibwe wamu n'abantu beetabe: ani ku bo ayinza okubuulira ekyo n'atulaga ebyasooka okubaawo? baleete abajulirwa baabwe baweebwe obutuukirivu: oba bawulire boogere nti Bya mazima.

¹⁰ Mmwe muli bajulirwa bange, bw'ayogera Mukama, n'omuweereza wange gwe nnalonda: mulyoke mumanye munzikirize mutegeere nga nze nzuuyo; tewali Katonda eyabumbibwa okusooka nze, so tewaliba alinziririra.

¹¹ Nze, nze mwene, nze Mukama; so tewali mulokozi wabula nze.

¹²Nze nabuulira era nalokola era nalaga, so tewabanga mu mmwe katonda mulala: kye mubeeredde abajulirwa bange, bw'ayogera Mukama, nange ndi Katonda.

¹³ Weewaawo, omusana kasookedde gubaawo era nze nzuuyo; so tewali ayinza okuwonya mu mukono gwange: ndikola omulimu, era ani aliguziyiza?

¹⁴ Bw'atyo bw'ayogera Mukama, omununuzi wammwe, Omutukuvu wa Isiraeri, nti Ku lwammwe natuma e Babulooni, era ndibaserengesa bonna ng'abadduse, be Bakaludaaya, mu byombo eby'okusanyuka kwabwe.

¹⁵Nze ndi Mukama, Omutukuvu wammwe, Omutonzi wa Isiraeri, Kabaka wammwe.

¹⁶ Bw'atyo bw'ayogera Mukama, akuba oluguudo mu nnyanja n'ekkubo mu mazzi ag'amaanyi;

¹⁷ afulumya eggaali n'embalaasi, eggye n'obuyinza; bagalamira wamu, tebaligolokoka; bazikiridde, bazikidde ng'enfuuzi:

¹⁸ nti Temujjukira ebyasooka okubaawo, so temulowooza bigambo bya dda.

¹⁹ Laba, ndikola ekigambo ekiggya; kaakano kirirabika; temulikimanya? ndikuba oluguudo ne mu lukoola, ne ndeeta emigga mu ddungu.

²⁰ Ensolo ez'omu nsiko zirinzisaamu ekitiibwa, ebibe ne bamaaya: kubanga ngaba amazzi mu lukoola n'emigga mu ddungu, okunywesa abantu bange, abalonde bange:

²¹ abantu be nneebumbira nzekka boolesenga ettendo lyange.

²²Naye tonkaabiranga, ggwe Yakobo; naye wantamwa, ggwe Isiraeri.

²³ Tondeeteranga nsolo ntono ey'ebibyo ebiweebwayo ebyokebwa; so tonzisaamu kitiibwa na ssaddaaka zo. Sikuweerezesanga n'ebiweebwayo, so sikukooyesanga na mugavu.

²⁴ Tonguliranga mmuli mpoomerevu na ffeeza, so tonzikusanga na masavu ga ssaddaaka zo: naye ggwe wampeerezesa n'ebibi byo, wankooyesa n'obutali butuukirivu bwo.

²⁵ Nze, nze mwene, nze nzuuyo asangula ebyonoono byo ku lwange nze; so sirijjukira bibi byo.

²⁶ Njijukiza; tuwoze fembi: leeta ensonga yo olyoke oweebwe obutuukirivu.

²⁷ Kitaawo eyasooka yayonoona n'abategeeza bo bansobya.

²⁸ Kyendiva nvumisa abakulu ab'omu watukuvu, era ndifuula Yakobo ekikolimo ne Isiraeri ekivume.