Read luganda Isaaya 46 Bible Online

Isaaya 46 - luganda bible

Isaaya 46

¹ Beri avuunama, Nebo akutama; ebifaananyi biri ku nsolo ne ku bisolo: ebintu bye mwatambuzatambuzanga bifuuse omugugu, omutwalo eri ensolo ekooye.

²Bakutama bavuunama wamu; tebayinza kuwonya mugugu, naye bo bennyini bagenze mu kusibibwa.

³ Mumpulire, ggwe ennyumba ya Yakobo, n'ekitundu kyonna ekifisseewo ku nnyumba ya Isiraeri, be nnaweekanga nze okuva mu lubuto, be nnasitulanga okuva munda:

⁴ n'okutuusa ku bukadde nze nzuuyo: n'okutuusa ku nvi naabasitulanga: nze nakola era nze naaweekanga: weewaawo, naasitulanga era naawonyanga.

⁵Ani gwe mulinfaananya era gwe mulinnenkanya era gwe mulingererako tufaanane?

⁶Abaggya ezaabu nnyingi mu nsawo ne bapima effeeza mu minzaani, bagulirira omuweesi wa zaabu n'agifuula katonda; bavuunamira, weewaawo, basinza.

⁷ Bamukongojja ku kibegabega, bamusitula ne bamusimba mu kifo kye n'ayimirira; mu kifo kye talisegukawo: weewaawo, walibaawo alimukaabirira, naye tayinza kwanukula newakubadde okumuwonya mu nnaku ze.

⁸Mujjukire ekyo, mwerage obusajja: mukijjukire nate, mmwe aboonoonyi.

⁹Mujjukire ebigambo ebyasooka eby'edda: kubanga nze Katonda so tewali mulala; nze Katonda so tewali anfaanana;

¹⁰ alanga enkomerero okuva ku lubereberye, n'ebigambo ebitannakolebwa okuva ku biro eby'edda; ayogera nti Okuteesa kwange kulinywera era ndikola bye njagala byonna:

¹¹ ayita ennyonyi ey'amaddu okuva ebuvanjuba, omusajja ow'okuteesa kwange okuva mu nsi ey'ewala; weewaawo, nayogera, n'okutuukiriza ndikituukiriza; nateesa, n'okukola ndikikola.

¹²Mumpulirize, mmwe abalina emitima emikakanyavu, abali ewala n'obutuukirivu:

¹³ nsembeza obutuukirivu bwange, tebuliba wala, n'obulokozi bwange tebulirwawo; era nditeeka obulokozi mu Sayuuni ku lwa Isiraeri ekitiibwa kyange.