Read luganda Okukungubaga 3 Bible Online

Okukungubaga 3 - luganda bible

Okukungubaga 3

¹ Nze ndi muntu oyo eyalaba ennaku olw'omuggo ogw'obusungu bwe.

² Yantwala n'antambuliza mu kizikiza so si mu musana.

³Mazima tata kundeetako mukono gwe okuzibya obudde.

⁴ Omubiri gwange n'eddiba lyange abikadiyizza; amenye amagumba gange.

⁵Anzimbiddeko n'anneetoolooza omususa n'okulumwa.

⁶ Antuuzizza mu bifo eby'ekizikiza ng'abo abaafa edda.

⁷ Ankomedde n'okuyinza ne siyinza kufuluma; azitoyezza olujegere lwange.

⁸ Weewaawo, bwe nkaaba ne nkuba enduulu okubeerwa, aggalira okusaba kwange.

⁹Akomedde amakubo gange n'amayinja amateme, akyamizza empitiro zange.

¹⁰ Ali gye ndi ng'eddubu eteega, ng'empologoma eri mu bifo eby'ekyama.

¹¹Akyamizza olugendo lwange, n'antaagulataagula; ansamaalirizza.

¹² Anaanudde omutego gwe, n'anteekawo okuba sabbaawa w'akasaale.

¹³ Ayingizizza mu mmeeme yange ebiri mu mufuko gwe.

¹⁴ Nfuuse eky'okusekererwa eri abantu bange bonna; n'oluyimba lwabwe okuzibya obudde.

¹⁵ Anzikusizza obubalagaze, annyiyizza abusinso,

¹⁶ Era amenye amannyo gange n'oluyinjayinja, ambisseeko evvu.

¹⁷Era wayawula emmeeme yange okuba ewala n'emirembe; nneerabira omukisa bwe gufaanana.

¹⁸Ne njogera nti Amaanyi gabuze, n'okusuubira kwange okuva eri Mukama.

¹⁹Jjukira ennaku zange n'obuyinike bwange, abusinso n'omususa.

²⁰Emmeeme yange ekyabijjukira, era ekutamye mu nda yange.

²¹Nkijjukira ekyo, kyenvudde mbeera n'okusuubira.

²² Kwe kusaasira kwa Mukama ffe obutamalwawo, kubanga ekisa kye tekiggwaawo.

²³ Kiba kiggya buli nkya; obwesigwa bwo bungi.

²⁴ Mukama gwe mugabo gwange, emmeeme yange bw'eyogera; kyennaava mmusuubira.

²⁵ Mukama aba mulungi eri abo abamulindirira, eri emmeeme emunoonya.

²⁶ Kirungi omuntu okusuubiranga n'okulindiriranga obulokozi bwa Mukama ng'ateredde.

²⁷ Kirungi omuntu okusitula ekikoligo mu buto bwe.

²⁸Atuule yekka asirike, kubanga akimutaddeko.

²⁹ Ateeke akamwa ke mu nfuufu oba nga mpozzi wanaabaawo okusuubira.

³⁰ Awe ettama lye eri oyo amukuba; akkute okuvumibwa.

³¹ Kubanga Mukama talisuula annaku zonna.

³² Kuba newakubadde ng'aleeta obuyinike, naye alikwatibwa ekisa ng'olufulube lw'okusaasira kwe bwe luli.

³³ Kubanga tagenderera kubonyaabonya newakubadde okuluma abaana b'abantu.

³⁴Okulinnyirira n'ekigere abasibe bonna ab'omu nsi,

³⁵ Okukyamya ensonga y'omuntu mu maaso g'oyo ali waggulu ennyo,

³⁶N'okulya ensonga, ebyo Mukama tabisiima.

³⁷ Ani oyo ayogera ne kituukirira, Mukama nga takiragidde?

³⁸ Mu kamwa k'oyo ali waggulu ennyo temuvaamu ebibi n'ebirungi?

³⁹ Omuntu omulamu yeemulugunyiza ki, omuntu olw'okubonerezebwa olw'ebibi bye?

⁴⁰ Tukebere tukeme emitima gyaffe, tukyukire nate eri Mukama.

⁴¹ Tuyimuse emitima gyaffe wamu n'engalo zaffe eri Katonda mu gulu.

⁴² Tusobezza era tujeemye; tosonyiye.

⁴³Otubisseeko obusungu, n'otuyigganya; osse so tosaasidde.

⁴⁴Weebisseeko ekire, okusaba kwaffe kuleme okugguka okutuukayo.

⁴⁵ Otufudde ng'empitambi n'ebisasiro wakati mu mawanga.

⁴⁶Abalabe baffe bonna batwasamidde nnyo akamwa kaabwe.

⁴⁷ Entiisa n'obunnya bitutuuseeko, okunyagibwa n'okuzikirira.

⁴⁸Eriiso lyange likulukuta emigga egy'amazzi olw'okuzikirira kw'omuwala w'abantu bange.

⁴⁹Eriiso lyange litonnya, terirekaayo, terita n'akatono,

⁵⁰ Okutuusa Mukama lw'anaatunula wansi n'alaba ng'ayima mu ggulu.

⁵¹Eriiso lyange linakuwaza emmeeme yange olw'abawala bonna ab'ekibuga kyange.

⁵²Bancoccedde ddala nnyo ng'ennyonyi, ababa abalabe bange awatali nsonga.

⁵³ Bamazeewo obulamu bwange mu nju ey'obunnya, era bansuddeko ejjinja.

⁵⁴ Amazzi gaakulukuta ku mutwe gwange; ne njogera nti Mmaliddwawo.

⁵⁵ Nakaabira erinnya lyo, ai Mukama, nga nnyima mu nju ey'obunnya eya wansi ennyo.

⁵⁶N'owulira eddoboozi lyange; tokisa kutu kwo kussa mukka kwange, okukaaba kwange.

⁵⁷ Wasembera ku lunaku kwe nnakukaabirira: n'oyogera nti Totya.

⁵⁸ Ai Mukama, wawoza ensonga ez'emmeeme yange; wanunula obulamu bwange.

⁵⁹ Ai Mukama, olabye okujoogebwa kwange; nsalira omusango.

⁶⁰ Olabye eggwanga lyonna lye bawalana, n'enkwe zonna ze bansalira.

⁶¹Owulidde okuvuma kwabwe, ai Mukama, n'enkwe zonna ze bansalira;

⁶²Emimwa gy'abo abangolokokerako n'ebyo bye bandowoolezaako okuzibya obudde.

⁶³ Tunuulira okutuula kwabwe n'okuyimuka kwabwe; nze ndi luyimba lwabwe,

⁶⁴ Olibasasula empeera, ai Mukama, ng'omulimu bwe guli ogw'emikono gyabwe.

⁶⁵ Olibawa omutima ogukakanyadde, ekikolimo kyo eri bo.

⁶⁶Olibayigganya n'obusungu, n'obazikiriza okuva wansi w'eggulu lya Mukama.