Read luganda Okukungubaga 5 Bible Online

Okukungubaga 5 - luganda bible

Okukungubaga 5

¹ Jjukira, ai Mukama, ebitujjidde: Tunula olabe okuvumibwa kwaffe.

²Obusika bwaffe bukyuse okuba obw'abannaggwanga, Ennyumba zaffe okuba ez'abatali ba muno.

³Tuli bamulekwa, so tetulina bakitaffe, Bannyaffe bali nga bannamwandu.

⁴Tunywedde amazzi gaffe lwa bintu; Enku zaffe bazituguza.

⁵ Abatucocca batuuse ku nsingo zaffe: Tukooye so tetulina kiwummulo.

⁶Tubagololedde Abamisiri emikono, N'Abasuuli olw'okukkuta emmere.

⁷ Bakitaffe baayonoona so tebaliiwo; Naffe twetisse obutali butuukirivu bwabwe.

⁸ Abaddu batufuga: Tewali wa kutulokola mu mukono gwabwe.

⁹ Tufuna emmere yaffe lwa kusingawo bulamu bwaffe Olw'ekitala eky'omu ddungu.

¹⁰ Eddiba lyaffe liddugadde ng'akabiga. Olw'olubugumu olw'enjala olwokya.

¹¹Baakwatira abakazi mu Sayuuni, Abawala abatamanyi musajja mu bibuga bya Yuda.

¹² Abakungu baawanikibwa n'omukono gwabwe: Amaaso g'abakadde tebaagassaamu kitiibwa.

¹³ Abalenzi baasitula olubengo, N'abaana abato beesittala nga beetikka enku.

¹⁴ Abakadde baweddewo mu mulyango Abalenzi baleseeyo okuyimba kwabwe.

¹⁵ Essanyu ery'omu mutima gwaffe likomye: Okuzina kwaffe kufuuse okuwuubaala.

¹⁶ Engule egudde evudde ku mutwe gwaffe: Zitusanze! kubanga twonoonye.

¹⁷ Omutima gwaffe kyeguvudde guyongobera; Olw'ebyo amaaso gaffe kyegavudde gayimbaala;

¹⁸ Olw'olusozi lwa Sayuuni, olulekeddwawo; Ebibe bitambulira okwo.

¹⁹ Ggwe, ai Mukama, obeerera ennaku zonna; Entebe yo ebaawo okuva ku mirembe okutuuka ku mirembe gyonna.

²⁰ Lwaki okutwerabira ennaku zonna, N'otuleka ebiro ebyenkanidde wano?

²¹ Tukyuse gy'oli, ai Mukama, naffe tunaakyusibwa; Ennaku zaffe ozizze buggya ng'edda.

²² Naye otusuulidde ddala, Otusunguwalidde nnyo.