Read luganda Matayo 15 Bible Online

Matayo 15 - luganda bible

Matayo 15

¹ Awo ne bajja eri Yesu Abafalisaayo n'abawandiisi abaava mu Yerusaalemi, nga bagamba nti

² Abayigirizwa bo kiki ekiboonoonyesa obulombolombo bwe twaweebwa abakadde? kubanga tebanaaba mu ngalo nga balya emmere.

³N'addamu n'abagamba nti Nammwe kiki ekiboonoonyesa etteeka lya Katonda olw'obulombolombo bwe mwaweebwa?

⁴ Kubanga Katonda yagamba nti Ossangamu ekitiibwa kitaawo ne nnyoko: nate nti Avumanga kitaawe oba nnyina, bamuttanga bussi.

⁵Naye mmwe mugamba nti Buli aligamba kitaawe oba nnyina nti Kyonna kye nnandikuwadde okukugasa, nkiwadde Katonda,

⁶alireka okussaamu ekitiibwa kitaawe. Mwadibya ekigambo kya Katonda olw'obulombolombo bwammwe bwe mwaweebwa.

⁷ Mmwe bannanfuusi, Isaaya yalagula bulungi ku mmwe, ng'agamba nti

⁸Abantu bano banzisaamu ekitiibwa kya ku mimwa; Naye omutima gwabwe gundi wala.

⁹Naye bansinziza bwereere, Nga bayigiriza amateeka g'abantu nga bye by'okukwata.

¹⁰N'ayita ekibiina, n'abagamba nti Muwulire, mutegeere:

¹¹ ekiyingira mu kamwa si kye kyonoona omuntu; naye ekiva mu kamwa, ekyo kye kyonoona omuntu.

¹²Awo abayigirizwa ne bajja, ne bamugamba nti Omanyi Abafalisaayo nga baanyiiga, bwe baawulira ekigambo ekyo?

¹³ Naye n'addamu n'agamba nti Buli kisimbe Kitange ow'omu ggulu ky'ataasimba, kirisimbulibwa.

¹⁴ Mubaleke: be basaale abatalaba. Naye omuzibe w'amaaso bw'akulembera muzibe munne, bombi baligwa mu bunnya.

¹⁵Peetero n'addamu n'amugamba nti Tunnyonnyole olugero olwo.

¹⁶Naye n'agamba nti Era nammwe temunnaba kuba na magezi?

¹⁷Temutegeera nti buli ekiyingira mu kamwa kigenda mu lubuto, ne kisuulibwa mu kiyigo?

¹⁸Naye ebifuluma mu kamwa biva mu mutima; n'ebyo bye byonoona omuntu.

¹⁹ Kubanga mu mutima mwe muva ebirowoozo ebibi, obussi, obwenzi, obukaba, obubbi, okuwaayiriza, okuvuma:

²⁰ebyo bye byonoona omuntu: naye okulya nga tanaabye mu ngalo tekwonoona muntu.

²¹ Yesu n'avaayo, n'agenda ku njuyi z'e Ttuulo n'e Sidoni.

²²Kale, laba, omukazi Omukanani n'ava ku mbibi eyo, n'ayogerera waggulu ng'agamba nti Onsaasire, Mukama wange, omwana wa Dawudi; muwala wange alwadde nnyo dayimooni.

²³Naye n'atamuddamu kigambo. Abayigirizwa be ne bajja ne bamwegayirira, nga bagamba nti Musiibule; kubanga atuleekaanira emabega.

²⁴ Naye n'addamu n'agamba nti Saatumibwa wabula eri endiga ezaabula ez'omu nnyumba ya Isiraeri.

²⁵Naye n'ajja, n'amusinza, ng'agamba nti Mukama wange, mbeera.

²⁶N'addamu n'agamba nti Si kirungi okuddira emmere y'abaana n'okugisuulira obubwa.

²⁷Naye n'agamba nti Weewaawo, Mukama wange: kubanga n'obubwa bulya obukunkumuka obugwa okuva ku mmeeza ya bakama baabwo.

²⁸ Yesu n'alyoka addamu n'amugamba nti Ggwe omukazi, okukkiriza kwo kunene: kibeere gy'oli nga bw'oyagala. Muwala we n'awona okuva mu kiseera ekyo.

²⁹ Yesu n'avaayo, n'ajja ku ttale ly'ennyanja y'e Ggaliraaya; n'alinnya ku lusozi, n'atuula okwo.

³⁰Ebibiina bingi ne bijja gy'ali, nga birina abawenyera, n'abazibe b'amaaso, ne bakasiru, n'abalema, n'abalala bangi, ne babassa awali ebigere bye; n'abawonya:

³¹ ekibiina n'okwewuunya ne beewuunya, bwe baalaba bakasiru nga boogera, abalema nga balamu, abawenyera nga batambula, n'abazibe b'amaaso nga balaba: ne bagulumiza Katonda wa Isiraeri.

³² Yesu n'ayita abayigirizwa be, n'agamba nti Nsaasira abantu, kubanga leero baakamala nange ennaku ssatu nga tebalina kya kulya: n'okubasiibula nga balina enjala sikyagala, wozzi banaazirikira mu kkubo.

³³Abayigirizwa ne bamugamba nti Tunaggya wa emigaati emingi bwe giti mu ddungu, okukkusa ekibiina ekinene ekyenkana wano?

³⁴Yesu n'abagamba nti Mulina emigaati emeka? Ne bagamba nti Musanvu, n'ebyennyanja ebitono si bingi.

³⁵N'alagira ekibiina okutuula wansi;

³⁶n'atoola emigaati musanvu n'ebyennyanja; ne yeebaza n'amenyamu n'awa abayigirizwa, abayigirizwa ne bagabira ebibiina.

³⁷Ne balya bonna, ne bakkuta: ne bakuŋŋaanya obukunkumuka obwasigalawo, ebisero musanvu ebyajjula.

³⁸N'abo abaalya baali abasajja enkumi nnya, abakazi n'abaana obutabassaako.

³⁹N'asiibula ebibiina, n'asaabala mu lyato, n'ajja mu mbibi y'e Magadani.