Read luganda Matayo 18 Bible Online

Matayo 18 - luganda bible

Matayo 18

¹ Mu kiseera ekyo abayigirizwa ne bajja eri Yesu ne bagamba nti Kale ani omukulu mu bwakabaka obw'omu ggulu?

²N'ayita omwana omuto, n'amuyimiriza wakati waabwe,

³ n'agamba nti Mazima mbagamba nti Bwe mutakyuka okufuuka ng'abaana abato, temuliyingira n'akatono mu bwakabaka obw'omu ggulu.

⁴Kale buli eyeewombeeka ng'omwana ono omuto, ye mukulu mu bwakabaka obw'omu ggulu.

⁵ Na buli alisembeza omwana omuto omu ng'ono mu linya lyange ng'asembezezza nze:

⁶ naye alyesitazza ku abo abato bano abanzikiriza, waakiri asibibwe mu bulago olubengo olunene, balyoke bamusuule mu buziba bw'ennyanja.

⁷Zirisanga ensi olw'ebigambo ebisittaza! Kubanga ebisittaza tebirirema kujja; naye zirisanga omuntu oyo aleeta ekisittaza!

⁸ Oba ng'omukono gwo oba kugulu kwo nga kukwesittaza, kutemeko, okusuule wala: kye kirungi oyingire mu bulamu ng'obuzeeko omukono oba kugulu, okusinga okusuulibwa mu muliro ogw'emirembe n'emirembe, ng'olina emikono gyombi oba amagulu gombi.

⁹Era oba ng'eriiso lyo nga likwesittaza, liggyeemu, olisuule wala: kye kirungi oyingire mu bulamu ng'oli wa ttulu, okusinga okusuulibwa mu Ggeyeena ey'omuliro, ng'olina amaaso gombi.

¹⁰ Mulabe nga temunyoomanga omu ku abo abato bano; kubanga mbagamba nti mu ggulu bamalayika baabwe batunuulira ennaku zonna amaaso ga Kitange ali mu ggulu. [

¹¹Kubanga Omwana w'omuntu yajja okulokola ekyabula.]

¹² Mulowooza mutya? Omuntu bw'aba n'endiga ze ekikumi, emu ku zo bw'ebula, taleka ziri ekyenda mu omwenda, n'agenda ku nsozi, n'anoonya eyo ebuzeeko?

¹³Era bw'aba ng'agirabye, mazima mbagamba nti agisanyukira eyo okusinga ziri ekyenda mu omwenda ezitaabuze.

¹⁴Bwe kityo tekyagalibwa mu maaso ga Kitammwe ali mu ggulu, omu ku abo abato bano okuzikirira.

¹⁵ Muganda wo bw'akukola obubi, genda omubuulirire ggwe naye mwekka: bw'akuwulira, ng'ofunye muganda wo.

¹⁶ Naye bw'atawulira, twala omulala naawe oba babiri, era mu kamwa k'abajulirwa ababiri oba basatu buli kigambo kikakate.

¹⁷ Era bw'agaana okuwulira abo, buulira ekkanisa: era bw'agaana okuwulira n'ekkanisa, abeere gy'oli nga munnaggwanga era omuwooza.

¹⁸ Mazima mbagamba nti Byonna bye mulisiba ku nsi birisibwa mu ggulu: era byonna bye mulisumulula ku nsi birisumululibwa mu ggulu.

¹⁹ Nate mbagamba nti Oba bannammwe babiri bwe beetabanga ku nsi buli kigambo kyonna kye balisaba, kiribakolerwa Kitange ali mu ggulu.

²⁰ Kubanga we baba ababiri oba basatu nga bakuŋŋaanye mu linnya lyange, nange ndi awo wakati waabwe.

²¹Awo Peetero n'ajja, n'amugamba nti Mukama wange, muganda wange bw'annyonoonanga, nnaamusonyiwanga emirundi emeka? okutuusa emirundi musanvu?

²² Yesu n'amugamba nti Sikugamba nti Okutuusa emirundi musanvu; naye nti Okutuusa emirundi ensanvu emirundi omusanvu.

²³Obwakabaka obw'omu ggulu kyebuva bufaananyizibwa n'omuntu eyali kabaka, eyayagala okubala omuwendo n'abaddu be.

²⁴Bwe yasooka okubala, ne bamuleetera omu, gw'abanja ettalanta akakumi.

²⁵Naye kubanga teyalina kya kusasula, mukama we n'alagira okumutunda, ne mukazi we, n'abaana be, n'ebintu byonna by'ali nabyo, ebbanja liggwe.

²⁶Awo omuddu n'agwa wansi n'amusinza, ng'agamba nti Mukama wange, mmanja mpola, nange ndikusasula byonna.

²⁷Mukama w'omuddu oyo n'amusaasira, n'amuta, n'amusonyiwa ebbanja.

²⁸Naye omuddu oyo n'afuluma, n'asanga muddu munne, gwe yali abanja eddinaali ekikumi: n'amukwata, n'amugwa mu bulago, ng'agamba nti Sasula ebbanja lyange.

²⁹Awo muddu munne n'agwa wansi n'amwegayirira, ng'agamba, nti Mmanja mpola, nange ndikusasula.

³⁰N'atakkiriza: naye n'agenda n'amuteeka mu kkomera, amale okusasula ebbanja.

³¹Awo baddu banne bwe baalaba bwe bibadde, ne banakuwala nnyo, ne bagenda ne babuulira mukama waabwe ebigambo byonna ebibaddeyo.

³²Awo mukama we n'amuyita n'amugamba nti Ggwe omuddu omubi, nakusonyiwa ebbanja liri lyonna, kubanga wanneegayirira:

³³naawe tekikugwanidde kusaasira muddu munno, nga nze bwe nnakusaasira ggwe?

³⁴ Mukama we n'asunguwala, n'amuwa mu bambowa, amale okusasula ebbanja lyonna.

³⁵ Bw'atyo Kitange ali mu ggulu bw'alibakola, bwe mutasonyiwa mu mitima gyammwe buli muntu muganda we.