Read luganda Matayo 22 Bible Online

Matayo 22 - luganda bible

Matayo 22

¹Yesu n'addamu n'ayogera nabo nate mu ngero, ng'agamba nti

² Obwakabaka obw'omu ggulu bufaananyizibwa omuntu eyali kabaka, eyamufumbira omwana we embaga ey'obugole,

³n'atuma abaddu be okuyita abaayitirwa embaga ey'obugole: ne batayagala kujja.

⁴ N'atuma nate abaddu abalala, ng'agamba nti Mubuulire abantu abaayitibwa nti Laba, nfumbye embaga yange; ente zange n'eza ssava zittiddwa, ne byonna byeteeseteese: mujje ku mbaga ey'obugole.

⁵Naye bo ne batassaayo mwoyo ne bagenda, omulala mu kyalo kye, omulala mu buguzi bwe:

⁶abaasigalawo ne bakwata abaddu be, ne babagirira ekyejo, ne babatta.

⁷ Kabaka n'akwatibwa obusungu; n'agamba eggye lye, n'azikiriza abassi abo, n'ayokya ekibuga kyabwe.

⁸Awo n'agamba abaddu be nti Obugole bweteeseteese, naye abo abaayitibwa tebasaanira.

⁹ Kale mugende mu masaŋŋanzira g'enguudo, bonna be munaalabayo mubayite ku mbaga ey'obugole.

¹⁰Abaddu bali ne bagenda mu nguudo, ne bakuŋŋaanya bonna be baalaba, ababi n'abalungi: obugole ne bujjula abagenyi.

¹¹Naye kabaka bwe yayingira okulaba abagenyi, n'alabamu omuntu atayambadde kyambalo kya bugole:

¹²n'amugamba nti Munnange, oyingidde otya wano nga tolina kyambalo kya bugole? n'abunira.

¹³ Awo kabaka n'agamba abaweereza be nti Mumusibe emikono n'amagulu, mumusuule mu kizikiza eky'ebweru; mwe muliba okukaaba n'okuluma obujiji.

¹⁴Kubanga bangi abayitibwa, naye abalondemu batono.

¹⁵ Awo Abafalisaayo ne bagenda, ne bateesa wamu bwe banaamutega mu bigambo.

¹⁶ Ne bamutumira abayigirizwa baabwe, wamu n'Abakerodiyaani, ne bagamba nti Omuyigiriza, tumanyi ng'oli wa mazima, era ng'oyigiriza mu mazima ekkubo lya Katonda, so ebigambo by'omuntu yenna tobissaako mwoyo: kubanga tososola mu bantu.

¹⁷Kale tubuulire, olowooza otya? Kirungi okuwa Kayisaali omusolo, oba si weewaawo?

¹⁸Naye Yesu n'ategeera obubi bwabwe, n'agamba nti Munkemera ki, mmwe bannanfuusi?

¹⁹Munjoleke effeeza ey'omusolo. Ne bamuleetera eddinaali.

²⁰N'abagamba nti Ekifaananyi kino n'obuwandiikeko by'ani?

²¹ Ne bamugamba nti Bya Kayisaali. Awo n'abagamba nti Kale musasule Kayisaali ebya Kayisaali; ne Katonda ebya Katonda.

²² Bwe baawulira, ne beewuunya, ne bamuleka, ne bagenda.

²³ Ku lunaku olwo ne bajja gy'ali Abasaddukaayo, abagamba nti tewali kuzuukira: ne bamubuuza,

²⁴ nga bagamba nti Omuyigiriza, Musa yagamba nti Omuntu bw'afanga, nga talina baana, muganda we addengawo awase mukazi we, azaalire muganda we ezzadde.

²⁵Awo ewaffe yaliyo ab'oluganda musanvu: ow'olubereberye n'awasa n'afa, naye nga bw'ataalina zzadde n'alekera muganda we mukazi we;

²⁶bw'atyo n'ow'okubiri, n'ow'okusatu, okutuusa bonna omusanvu.

²⁷Oluvannyuma, bonna nga baweddewo, omukazi n'afa.

²⁸Kale mu kuzuukira aliba muka ani ku abo omusanvu? kubanga bonna baabuna okumufumbirwa.

²⁹Naye Yesu n'addamu n'abagamba nti Mukyama olw'obutamanya ebyawandiikibwa, newakubadde amaanyi ga Katonda.

³⁰Kubanga mu kuzuukira tebawasa, so tebafumbirwa, naye bali nga bamalayika mu ggulu.

³¹Naye eby'okuzuukira kw'abafu, temwasoma Katonda kye yabagamba nti

³² Nze ndi Katonda wa Ibulaimu, era Katonda wa Isaaka, era Katonda wa Yakobo Si Katonda wa bafu, naye wa balamu.

³³Ebibiina bwe byawulira ne byewuunya okuyigiriza kwe.

³⁴ Naye Abafalisaayo bwe baawulira nti abunizza Abasaddukaayo, ne bakuŋŋaanira wamu.

³⁵Omu ku bo, ow'amateeka, n'amubuuza ng'amukema

³⁶nti Omuyigiriza, ekiragiro ekikulu mu mateeka kiruwa?

³⁷ Naye n'amugamba nti Yagalanga Mukama Katonda wo n'omutima gwo gwonna, n'obulamu bwo bwonna, n'amagezi go gonna.

³⁸Kino kye kiragiro ekikulu eky'olubereberye.

³⁹ N'eky'okubiri ekikifaanana kye kino nti Yagalanga muliraanwa wo nga bwe weeyagala wekka.

⁴⁰ Mu biragiro bino byombi amateeka gonna mwe gasinziira, era ne bannabbi.

⁴¹ Abafalisaayo bwe baakuŋŋaana, Yesu n'ababuuza,

⁴² ng'agamba nti Kristo mumulowooza mutya? ye mwana w'ani? Ne bamugamba nti Wa Dawudi.

⁴³N'abagamba nti Kale, Dawudi mu Mwoyo kiki ekimuyisa Mukama we, ng'agamba nti

⁴⁴ Mukama yagamba Mukama wange nti Tuula ku mukono gwange ogwa ddyo, Okutuusa lwe ndissa abalabe bo wansi w'ebigere byo?

⁴⁵Kale oba nga Dawudi amuyita Mukama we, ali atya omwana we?

⁴⁶Ne wataba muntu eyayinza okumuddamu ekigambo, era okuva ku lunaku olwo tewali muntu eyayaŋŋanga okumubuuza ekigambo nate.