Read luganda Matayo 23 Bible Online

Matayo 23 - luganda bible

Matayo 23

¹ Awo Yesu n'ayogera n'ebibiina n'abayigirizwa be,

²ng'agamba nti Abawandiisi n'Abafalisaayo batudde ku ntebe ya Musa:

³ kale ebigambo byonna bye babagamba, mubikole mubikwate: naye temukola nga bo bwe bakola; kubanga boogera naye tebakola.

⁴Era basiba emigugu egizitowa egiteetikkika, bagitikka abantu ku kibegabega; naye bo bennyini tebaagala kuginyeenyaako n'engalo yaabwe.

⁵ Naye ebikolwa byabwe byonna babikola era abantu babirabe, kubanga bagaziya fulakuteri zaabwe, era bongerako amatanvuuwa,

⁶ era baagala ebifo eby'oku manjo ku mbaga, n'entebe ez'ekitiibwa mu makuŋŋaaniro,

⁷n'okulamusibwa mu butale, n'okuyitibwa abantu nti Labbi.

⁸Naye mmwe temuyitibwanga Labbi: kubanga, omuyigiriza wammwe ali omu, nammwe mwenna muli ba luganda.

⁹Era temuyitanga muntu ku nsi kitammwe: kubanga Kitammwe ali omu, ali mu ggulu.

¹⁰So temuyitibwanga balagirizi: kubanga omulagirizi wammwe ali omu, ye Kristo.

¹¹ Naye mu mmwe abasinga obukulu anaabanga muweereza wammwe.

¹² Na buli aneegulumizanga anakkakkanyizibwanga; na buli aneekakkanyanga anaagulumizibwanga.

¹³Naye ziribasanga mmwe, abawandiisi n'Abafalisaayo, bannanfuusi! kubanga muggalira obwakabaka obw'omu ggulu mu maaso g'abantu: kubanga mmwe temuyingira, n'abo ababa bayingira temubaganya kuyingira. [

¹⁴Ziribasanga mmwe, abawandiisi n'Abafalisaayo, bannanfuusi! Kubanga mulya ennyumba za bannamwandu, era ne mwefuula abasaba ennyo: n'olwekyo mulibaako omusango ogusinga obunene.]

¹⁵Ziribasanga mmwe, abawandiisi n'Abafalisaayo, bannanfuusi! kubanga mwetooloola mu nnyanja ne ku lukalu okukyusa omuntu omu; naye bw'alabika, mumufuula mwana wa Ggeyeena emirundi ebiri okukira mmwe.

¹⁶ Ziribasanga mmwe, abasaale abazibe b'amaaso, abagamba nti Buli anaalayiranga yeekaalu, nga si kintu; naye buli anaalayiranga ezaabu ey'omu yeekaalu, ng'azzizza omusango.

¹⁷Mmwe abasiru era abazibe b'amaaso; kubanga ekikira obukulu kiruwa, ezaabu, oba yeekaalu etukuza ezaabu?

¹⁸Oba mugamba nti Omuntu bw'anaalayiranga ekyoto, nga si kintu; naye buli anaalayiranga ekitone ekiriko, ng'azzizza omusango.

¹⁹ Mmwe abazibe b'amaaso: kubanga ekikira obukulu kiruwa, ekitone, oba ekyoto ekitukuza ekitone?

²⁰Naye alayira ekyoto, alayira kyo, ne byonna ebiriko.

²¹Naye alayira yeekaalu, alayira yo, n'oyo atuula omwo.

²² Naye alayira eggulu, alayira ntebe ya Katonda, n'oyo agituulako.

²³ Ziribasanga mmwe, abawandiisi n'Abafalisaayo, bannanfuusi! kubanga muwa ekitundu eky'ekkumi ekya nnabbugira ne aneta ne kkumino, ne mulekayo ebigambo ebikulu eby'amateeka, obutalyanga nsonga, n'ekisa, n'okukkirizanga: naye bino kyabagwanira okubikola, era na biri obutabirekaayo.

²⁴Mmwe abasaale abazibe b'amaaso abasengejja ensiri, ne mumira eŋŋamira.

²⁵ Ziribasanga mmwe abawandiisi n'Abafalisaayo, bannanfuusi! kubanga munaaza kungulu ku kikompe n'ekibya, naye munda mujjudde obunyazi n'obuteegendereza.

²⁶ Ggwe Omufalisaayo omuzibe w'amaaso, sooka onaaze munda mu kikompe n'ekibya, ne kungulu kwakyo kulyoke kube kulungi.

²⁷ Ziribasanga mmwe, abawandiisi n'Abafalisaayo, bannanfuusi! kubanga mufaanana amalaalo agasiigibwa okutukula, agalabika kungulu nga gawoomye, naye munda mujjudde amagumba g'abafu, n'empitambi yonna.

²⁸ Bwe mutyo nammwe kungulu mulabika mu bantu nga muli batuukirivu, naye munda mujjudde obunnanfuusi n'obujeemu.

²⁹Ziribasanga mmwe, abawandiisi n'Abafalisaayo, bannanfuusi! kubanga muzimba amalaalo ga bannabbi, muwoomya ebiggya by'abatuukirivu,

³⁰ne mugamba nti Singa twaliwo mu biro bya bajjajjaffe, tetwandissizza kimu nabo mu musaayi gwa bannabbi.

³¹ Bwe mutyo mwetegeeza mwekka nti muli baana baabwe abatta bannabbi.

³²Kale mujjuze ekigera kya bajjajjammwe.

³³ Mmwe emisota, abaana b'embalasaasa, mulidduka mutya omusango ogwa Ggeyeena?

³⁴ Laba, kyenva mbatumira bannabbi, n'ab'amagezi, n'abawandiisi: n'abamu ku bo mulibatta mulibakomerera; n'abalala mulibakuba emiggo mu makuŋŋaaniro gammwe, mulibayigganya mu byalo byonna:

³⁵ mulyoke mujjirwe omusaayi gwonna omutuukirivu ogwayiika ku nsi, okusookera ku musaayi gwa Abiri oyo omutuukirivu okutuusa ku musaayi gwa Zaakaliya omwana wa Balakiya, gwe mwattira wakati wa yeekaalu n'ekyoto.

³⁶Mazima mbagamba nti Ebigambo bino byonna birituukirira ab'emirembe gino.

³⁷ Yerusaalemi, Yerusaalemi, atta bannabbi, akasuukirira amayinja abantu abatumibwa gy'ali! emirundi emeka gye nnayagalira ddala okukuŋŋaanya abaana bo, ng'enkoko bw'ekuŋŋaanya obwana bwayo munda w'ebiwaawaatiro byayo, ne mutayagala!

³⁸ Laba, ennyumba yammwe ebalekeddwa kifulukwa.

³⁹ Kubanga mbagamba nti Temulindabako n'akatono okusooka leero, okutuusa lwe mulyogera nti Aweebwa omukisa ajja mu linnya lya Mukama.