Read luganda Matayo 27 Bible Online

Matayo 27 - luganda bible

Matayo 27

¹ Naye obudde bwe bwakya, bakabona abakulu bonna n'abakadde b'abantu ne bateesa wamu ebya Yesu okumutta:

² ne bamusiba, ne bamutwala, ne bamuwaayo eri Piraato owessaza.

³ Awo Yuda, eyamulyamu olukwe, bwe yalaba ng'omusango gumusinze, ne yejjusa, n'addiza bakabona abakulu n'abakadde ebitundu ebyo amakumi asatu ebya ffeeza,

⁴ng'agamba nti Nnayonoona okulyamu olukwe omusaayi ogutalina kabi. Naye bo ne bamugamba nti Guno guli ku ffe? musango gwo.

⁵ Effeeza n'azisuula mu yeekaalu, n'afuluma, n'agenda yeetuga.

⁶ Naye bakabona abakulu ne batwala ebitundu biri ebya ffeeza, ne bagamba nti Kya muzizo okubiteeka mu ggwanika lya Katonda, kubanga muwendo gwa musaayi.

⁷Ne bateesa, ne bazigulamu olusuku lw'omubumbi, okuziikangamu abagenyi.

⁸ Olusuku luli kyeruva luyitibwa olusuku lw'omusaayi, ne kaakano.

⁹ Awo lwe kyatuukirira ekyayogererwa mu nnabbi Yeremiya, ng'agamba nti Ne batwala ebitundu ebya ffeeza amakumi asatu, omuwendo gw'oyo gwe baalamula omuwendo, abantu ku baana ba Isiraeri gwe baalamula;

¹⁰ne babiggyamu olusuku lw'omubumbi, nga Mukama bwe yandagira.

¹¹ Awo Yesu n'ayimirira mu maaso g'owessaza: owessaza n'amubuuza ng'agamba nti Ggwe Kabaka w'Abayudaaya? Yesu n'amugamba nti Oyogedde.

¹² Bakabona abakulu n'abakadde bwe baamuloopa, n'ataddamu n'akatono.

¹³Awo Piraato n'amugamba nti Towulira bigambo bino bye bakulumiriza bwe biri?

¹⁴ Naye teyamuddamu na kigambo na kimu: owessaza n'okwewuunya ne yeewuunya nnyo.

¹⁵ Naye ku mbaga ow'essaza yalina empisa okusumululiranga ekibiina omusibe omu, gwe baayagalanga.

¹⁶Era mu biro ebyo baalina omusibe omumanyi, ayitibwa Balaba.

¹⁷Awo bwe baakuŋŋaana, Piraato n'abagamba nti Aluwa gwe mwagala mmubasumululire? Balaba, oba Yesu ayitibwa Kristo?

¹⁸ Kubanga yamanya nga bamuweesezzaayo buggya.

¹⁹Naye bwe yatuula ku ntebe ey'emisango, mukazi we n'amutumira, ng'agamba nti Omuntu oyo omutuukirivu tomukola kintu n'akatono: kubanga nnalumiddwa leero bingi mu kirooto ku lulwe.

²⁰Naye bakabona abakulu n'abakadde ne babuulirira ebibiina okusaba Balaba, bazikirize Yesu.

²¹Naye owessaza n'addamu n'abagamba nti Ku abo bombi aluwa gwe mwagala mmubasumululire? Ne bagamba nti Balaba

²²Piraato n'abagamba nti Kale nnaakola ntya Yesu ayitibwa Kristo? Bonna ne bagamba nti Akomererwe.

²³Naye n'agamba nti Lwaki? ekibi ky'akoze kiruwa? Naye ne bakaayana nnyo, ne bagamba nti Akomererwe.

²⁴ Naye Piraato bwe yalaba nga taasobole n'akatono, era nga bayinze okukaayana, n'addira amazzi, n'anaaba mu ngalo mu maaso g'ekibiina ng'agamba nti Nze siriiko kabi olw'omusaayi gw'omuntu ono omutuukirivu; musango gwammwe.

²⁵ Abantu bonna ne baddamu ne bagamba nti Omusaayi gwe gubeere ku ffe, ne ku baana baffe.

²⁶Awo n'abasumululira Balaba: naye Yesu n'amukuba enkoba n'alyoka amuwaayo okukomererwa.

²⁷ Awo basserikale b'owessaza ne batwala Yesu mu kigango eky'emisango, ne bamukuŋŋaanyizaako ekitongole kyonna.

²⁸Ne bamwambula, ne bamwambaza olugoye olumyufu.

²⁹Ne baluka engule ey'amaggwa, ne bagissa ku mutwe gwe, n'olumuli mu mukono gwe ogwa ddyo; ne bafukamira mu maaso ge, ne bamuduulira, nga bagamba nti Mirembe, Kabaka w'Abayudaaya!

³⁰ Ne bamuwandira amalusu, ne batoola olumuli luli ne bamukuba mu mutwe.

³¹ Awo bwe baamala okumuduulira, ne bamwambulako olugoye, ne bamwambaza ebyambalo bye, ne bamutwala okumukomerera.

³²Naye bwe baali bafuluma, ne basisinkana omuntu Omukuleene, erinnya lye Simooni: ne bamuwaliriza oyo yeetikke omusalaba gwe.

³³Bwe baatuuka mu kifo ekiyitibwa Gologoosa, amakulu gaakyo kifo kya kiwanga,

³⁴ ne bamuwa omwenge okunywa ogutabuddwamu omususa: naye bwe yalegako, n'atayagala kunywa.

³⁵ Bwe baamala okumukomerera, ne bagabana ebyambalo bye, nga bakuba akalulu;

³⁶ne batuula awo ne bamutunuulira.

³⁷Ne bassa waggulu ku mutwe gwe omusango gwe oguwandiikiddwa nti ONO YE YESU KABAKA W'ABAYUDAAYA.

³⁸ Awo abanyazi babiri ne bakomererwa naye, omu ku mukono ogwa ddyo, omulala ku gwa kkono.

³⁹ N'abaali bayita ne bamuvuma, nga banyeenya emitwe gyabwe,

⁴⁰ nga bagamba nti Ggwe amenya yeekaalu, agizimbira ennaku essatu, weerokole: oba nga oli Mwana wa Katonda, va ku musalaba okke.

⁴¹Bakabona abakulu n'abawandiisi n'abakadde ne baduula bwe batyo, nga bagamba nti

⁴²Yalokola balala; tayinza kwerokola yekka. Ye Kabaka wa Isiraeri; ave kaakano ku musalaba, naffe tunaamukkiriza.

⁴³ Yeesiga Katonda; amulokole kaakano, oba amwagala: kubanga yagamba nti Ndi Mwana wa Katonda.

⁴⁴Abanyazi abaakomererwa naye era nabo ne bamuvuma bwe batyo.

⁴⁵Naye okuva ku ssaawa ey'omukaaga kyali kizikiza ku nsi yonna okutuuka ku ssaawa ey'omwenda.

⁴⁶ Obudde bwe bwatuuka ng'essaawa ey'omwenda Yesu n'ayogerera waggulu n'eddoboozi ddene, ng'agamba nti Eri, Eri, lama sabakusaani? amakulu gaakyo nti Katonda wange, Katonda wange, kiki ekikundesezza?

⁴⁷Naye abalala abaali bayimiriddewo, bwe baawulira, ne bagamba nti Ono ayita Eriya.

⁴⁸ Amangu ago munnaabwe omu n'addukana, n'atoola ekisuumwa, n'akijjuza omwenge omukaatuufu, n'akissa ku lumuli, n'amunywesa.

⁴⁹Naye abalala ne bagamba nti Leka tulabe nga Eriya anajja okumulokola.

⁵⁰Naye Yesu n'ayogerera nate waggulu n'eddoboozi ddene, n'ata omwoyo gwe.

⁵¹ Laba, eggigi lya yeekaalu ne liyulikamu wabiri okuva waggulu okutuuka wansi; ensi n'ekankana; enjazi ne zaatika:

⁵² entaana ne zibikkuka; emirambo mingi egy'abatukuvu abaali beebase ne gizuukizibwa;

⁵³ ne bava mu ntaana bwe yamala okuzuukira, ne bayingira mu kibuga ekitukuvu, abantu bangi ne babalaba.

⁵⁴Naye omwami w'ekitongole, na bali abaali naye nga batunuulira Yesu, bwe baalaba ekikankano, n'ebigambo ebibaddewo, ne batya nnyo, ne bagamba nti Mazima ono abadde Mwana wa Katonda.

⁵⁵ Waaliwo n'abakazi bangi abaayimirira ewala nga balengera, abaayitanga ne Yesu okuva e Ggaliraaya, abaamuweerezanga:

⁵⁶ mu abo mwalimu Malyamu Magudaleene, ne Malyamu nnyina Yakobo ne Yose, ne nnyina w'abaana ba Zebbedaayo.

⁵⁷ Naye obudde bwali buwungeera, n'ajja omuntu omugagga, eyava Alimasaya, erinnya lye Yusufu, era naye yali muyigirizwa wa Yesu:

⁵⁸ oyo n'agenda eri Piraato, n'asaba omulambo gwa Yesu. Awo Piraato n'alagira okugumuwa.

⁵⁹Yusufu n'atwala omulambo, n'aguzinga mu bafuta enjeru,

⁶⁰ n'aguteeka mu ntaana ye empya, gye yasima mu lwazi: n'ayiringisa ejjinja ddene n'alissa ku mulyango gw'entaana, n'agenda.

⁶¹Waaliwo Malyamu Magudaleene, ne Malyamu ow'okubiri, nga batudde mu maaso g'entaana.

⁶²Naye enkya, lwe lunaku olwaddirira olw'okuteekateeka, bakabona abakulu n'Abafalisaayo ne bakuŋŋaanira ewa Piraato,

⁶³ ne bagamba nti Omwami, tujjukidde omulimba oyo eyagamba ng'akyali mulamu nti Ennaku bwe ziriyitawo essatu ndizuukira.

⁶⁴Kale lagira bakuumire ddala amalaalo okutuusa ku lunaku olw'okusatu, abayigirizwa be batera okujja okumubba, bagambe abantu nti Azuukidde mu bafu: era okukyama okw'oluvannyuma kulisinga kuli okwasooka.

⁶⁵Piraato n'abagamba nti Mulina abakuumi: mugende, mugakuumire ddala nga bwe muyinza.

⁶⁶ Nabo ne bagenda, ne bagakuumira ddala amalaalo, ejjinja ne balissaako akabonero, n'abakuumi nga weebali.