Read luganda Matayo 4 Bible Online

Matayo 4 - luganda bible

Matayo 4

¹ Awo Yesu n'atwalibwa Omwoyo mu ddungu okukemebwa Setaani.

² Bwe yamala okusiiba ennaku amakumi ana, emisana n'ekiro, enjala n'eryoka emuluma.

³ Omukemi n'ajja n'amugamba nti Oba oli Mwana wa Katonda, gamba amayinja gano gafuuke emmere.

⁴ Naye n'addamu n'agamba nti Kyawandiikibwa nti Omuntu tabanga mulamu na mmere yokka, wabula na buli kigambo ekiva mu kamwa ka Katonda.

⁵ Awo Setaani n'amutwala ku kibuga ekitukuvu; n'amuteeka ku kitikkiro kya yeekaalu,

⁶n'amugamba nti Oba oli Mwana wa Katonda, buuka ogwe wansi: kubanga kyawandiikibwa nti Alikulagiririza bamalayika be: Mu mikono gyabwe balikuwanirira, Oleme okwesittala ekigere kyo ku jjinja.

⁷ Yesu n'amugamba nti Kyawandiikibwa nate nti tokemanga Mukama Katonda wo.

⁸Ate Setaani n'amutwala ku lusozi oluwanvu ennyo, n'amulaga ensi za bakabaka bonna abali mu nsi, n'ekitiibwa kyazo;

⁹n'amugamba nti Ebyo byonna naabikuwa bw'onoovuunama okunsinza.

¹⁰ Awo Yesu n'amugamba nti Vaawo genda, Setaani: kubanga kyawandiikibwa nti Osinzanga Mukama Katonda wo, era omuweerezanga yekka.

¹¹ Awo Setaani n'amuleka; laba, bamalayika ne bajja, ne bamuweereza.

¹² Awo bwe yawulira nga Yokaana bamuwaddeyo, n'addayo e Ggaliraaya;

¹³ ng'avudde e Nazaaleesi, n'ajja, n'abeera e Kaperunawumu, ekiri ku nnyanja, mu nsi ya Zebbulooni ne Nafutaali:

¹⁴ekigambo kituukirire nnabbi Isaaya kye yayogera, ng'agamba nti

¹⁵ Ensi ya Zebbulooni n'ensi ya Nafutaali, Ekkubo ly'ennyanja, emitala wa Yoludaani, E Ggaliraaya ey'amawanga,

¹⁶Abantu abaali batuula mu kizikiza, Baalaba omusana mungi, N'abo abaali batuula mu nsi y'okufa ne mu kisiikirize kyakwo, Omusana gwabaakira.

¹⁷ Yesu n'asookera awo okubuulira n'okugamba nti Mwenenye; kubanga okwakabaka obw'omu ggulu bunaatera okutuuka.

¹⁸ Bwe yali ng'atambula ku ttale ly'ennyanja y'e Ggaliraaya, n'alaba ab'oluganda babiri, Simooni gwe bayita Peetero, ne Andereya muganda we, nga basuula omugonjo mu nnyanja, kubanga baali bavubi.

¹⁹N'abagamba nti Mujje, muyite nange, nange ndibafuula abavubi b'abantu.

²⁰ Amangu ago ne baleka emigonjo, ne bayita naye.

²¹N'atambulako mu maaso n'alaba ab'oluganda babiri abalala, Yakobo omwana wa Zebedaayo, ne Yokaana muganda we, nga bali mu lyato wamu ne kitaabwe Zebeedaayo, nga bayunga emigonjo gyabwe; n'abayita.

²²Amangu ago ne baleka awo eryato ne kitaabwe, ne bagenda naye.

²³ Yesu n'abuna Ggaliraaya yonna, ng'abayigiririza mu makuŋŋaaniro gaabwe, era ng'abuulira enjiri ey'obwakabaka, era ng'awonya endwadde zonna n'obunafu bwonna mu bantu.

²⁴ Ebigambo bye ne bibuna Obusuuli bwonna: ne bamuleetera bonna abaali balwadde, abaali bakwatiddwa endwadde ezitali zimu, n'ebibonyoobonyo, n'ab'emizimu, n'ab'ensimbu, n'abaali bakoozimbye; n'abawonya.

²⁵ Ebibiina bingi, nga bava e Ggaliraaya n'e Dekapoli n'e Yerusaalemi n'e Buyudaaya n'emitala wa Yoludaani ne bayita naye.